VOV4.Sêdang - Mơhé tơdroăng pơreăng COVID 19 xông tâ tú ó, laga 6 khế hiăng hluâ, kong pơlê Gia Lai xuân châ kơlo tơtêk 9,7%. Châ tơƀrê kố châ kum ing tơdroăng kong pơlê pro tơ’lêi hlâu mơnhông 2 kơvâ cheăng kâ ki xiâm cho on tơhrik ki vêh pro ƀă păn mơnăn mơnôa xúa kơmăi kơmok rơxông nếo. Mê cho mơnhên châ tơbleăng tung Hneăng hôp Khu pơkuâ Đảng ƀô̆ kong pơlê roh má 4 (po rơdâ) châ Khu pơkuâ cheăng Đảng kong pơlê tơkŭm po tung hâi lơ 2/7.

Tiô tơbleăng a Hneăng hôp, 6 khế hiăng hluâ, tâi tâng mơjiâng pro kơmăi kơmok dêi kong pơlê châ lối 11 rơpâu rơtal liăn, tâk lối 17% tâng pơchông ƀă roh kố hơnăm hdrối; tâi tâng kơxô̆ liăn mơ’no lâp pơlê pơla a Gia Lai tiô tối châ vâ chê 33.500 rơtal liăn. Tơdế tung kơxô̆ kố châ mơjiâng ki hên xua tơdroăng pêi pro mâu tơdroăng tơkêa bro on tơhrik kơtâu ƀă khía a kong pơlê, ƀă kơxô̆ liăn mơ’no lối 17 rơpâu rơtal liăn.

Rơtế amê, nôkố Gia Lai ai 33 tơdroăng tơkêa bro păn mơnăn mơnôa xúa kơmăi kơmok rơxông nếo hiăng châ ăm troăng hơlâ mơ’no liăn cheăng, ƀă kơxô̆ liăn lối 4.500 rơtal liăn. Xuân tung pơla kố nah, kong pơlê hiăng pêt nếo 131 ha kong, pơ’lêh lối 700 ha loăng plâi ki ôh tá dâi lĕm vêh pêt tơmeăm ki ê.

A Sa Ly tơplôu ƀă tơbleăng