VOV4.Sêdang - Pôa Hồ Văn Niên, kăn pơkuâ hnê ngăn Đảng kong pơlê Gia Lai nếo pơkâ thế kơ koan kŏng an kong pơlê pơsăm tối tơdroăng ki pro tâ tú pơreăng ki rơ-iêo ăm mơngế. Mê cho ngế ki tâ pơreăng COVID-19 ai mah kơxô̆ BN95028 châ ‘nâi a hâi lơ 24/7, cho kăn ƀô̆ Măt trâ̆n Tơnêi têa bêng Tây Sơn, pơlê kong kơdrâm Plei Ku. Maluâ cho F1 dêi ngế ki tâ pơreăng 36712, la kăn ƀô̆ kố tối, tơná cho F2. Ngế ki kố xuân troh a Vi ƀan hnê ngăn bêng pêi cheăng, lăm troh a hên rơpŏng tê mơdró vâ pơkâ thế mâu rơpŏng tê mơdró tơhrâ rak tơniăn hbrâ mơdât pơreăng COVID-19.

Xua tơbleăng ôh tá tơdrăng, ngế ki tâ pơreăng kố hiăng pro 3 ngế tung rơpŏng hngêi tâ pơreăng COVID-19. Tơbleăng tăng, Tíu xiâm séa ngăn châi tamo Gia Lai mơnhên ai 51 ngế cho F1 ƀă 82 ngế cho F2 sap ing ngế kăn ƀô̆ ki kố.

Katarina Nga tơplôu ƀă tơbleăng