VOV4.Sêdang - Drêng pơreăng Covid 19 xông tâ tú ó tá tung kong pơlê ƀă kong pơlê ki ê, Khu pơkuâ Kơmăi kơmok – tê mơdró Gia Lai hiăng ai pơkâ tơniăn pơtroh tŭm kế tơmeăm khoăng kal xúa rêm hâi ƀă rôe tơmeăm pêi lo ing chiâk deăng tung pơla ai pơreăng xông tâ tú. Pơtối mê, Khu pơkuâ Kơmăi kơmok – tê mơdró Gia Lai hiăng mơjiâng pơkâ rôe ‘măn tơmeăm ki kal xúa rêm hâi vâ vêh tê ăm kuăn pơlê, ƀă tâi tâng kơnâ 9.000 rơtal liăn. Pơkâ 65 khu tê mơdró tung kong pơlê mơdêk tơdroăng ‘măn tơmeăm tung hnôu tâk 1,5 xôh tâng pơchông hdrối nah.

Gia Lai mơdêk tơdroăng ‘măn tơmeăm kal xúa rêm hâi vâ hbrâ mơdât pơreăng COVID 19

Rơtế amê, tơdroăng rak tơniăn tê tơmeăm khoăng pêi lo ing chiâk deăng ăm kuăn pơlê pêi chiâk deăng a kong pơlê a hngêi kơmăi uâ mơdiê xuân châ Khu pơkuâ Kơmăi kơmok – tê mơdró kong pơlê Gia Lai tơtrŏng pêi pro. Kơvâ kơmăi kơmok – tê mơdró mâu tơring ai troăng pơto tơmeăm rak tơniăn hbrâ mơdât pơreăng troh a hngêi kơmăi uâ mơdiê; mơdât ôh tá ăm châ tê tơmeăm pêi lo ing chiâk deăng; pơkâ mâu khu tê mơdró pơtối rak tơdroăng pêi kâ, tơkŭm po ăm mơngế pêi cheăng mơjiâng pro kế tơmeăm khoăng ƀă pơtê a tíu mơjiâng pro kế tơmeăm khoăng, tơkŭm po rôe tơmeăm pêi lo ing chiâk deăng ăm kuăn pơlê.

            A Sa Ly tơplôu ƀă tơbleăng