VOV4.Sêdang - Kong pơlê Gia Lai nôkố ai 16/17 tơdroăng tơkêa on tơhrik kơtâu ƀă khía mâ hâi dế châ mơjiâng pro ƀă tâi tâng ivá mơ’no lối 1200 MW, ƀă tâi tâng kơxô̆ liăn ‘no lối 40 rơpâu rơtal liăn. Laga mâu khu ‘no liăn mơjiâng pro ‘’tơ’noăng’’ dêi rơpó vâ rĕng krâ on tơhrik hdrối hâi lơ 31/10/2021 vâ xúa yă châ kơjo kum tiô pơkâ dêi Chin phuh, mê hiăng pro ai hên tơdroăng ki ôh tá môi tuăn tung mơjiâng pro ƀă xúa mơngế pêi cheăng. Vi ƀan hnê ngăn kong pơlê Gia Lai ăm ‘nâi, kong pơlê dế tơkŭm pơkâ tơleăng vâ rĕng pơtê tơdroăng ki ôh tá môi tuăn.

Tiô tơdroăng séa ngăn mơ’nui khế 4/2021 dêi Khu pơkuâ Kơmăi kơmok tê mơdró kong pơlê Gia Lai, nôkố, ai 16/17 tơdroăng tơkêa bro on tơhrik kơtâu ƀă khía a kong pơlê dế mơjiâng pro, laga hên khu mơ’no liăn cheăng tá hâi kêi đeăng pro mơ-éa mung tơnêi tiô pơkâ Luât tơnêi tơníu. Ki phá tơ-ê, ai mâu tơdroăng tơkêa bro a tơring Kông Chro mơjiâng pro mâu kế tơmeăm a tơnêi kong.

Pôa Nguyễn Duy Lộc, Kăn phŏ pơkuâ Khu pơkuâ kơmăi kơmok – tê mơdró kong pơlê Gia Lai tối ăm ‘nâi, xiâm kối cho pơrá cho mâu tơmeăm râ 1, ối tung pơkuâ dêi Khu xiâm pơkuâ kơmăi kơmok – tê mơdró. Drêng mơjiâng pro, mâu khu mơjiâng pro bu kal tơbleăng ăm khu râ kăn pơkuâ (râ tơring), xua mê drêng séa ngăn nhên khât a mơ’nui khế 4/2021, kơvâ kơmăi kơmok – tê mơdró nếo ‘nâi. Ƀă mâu tơdroăng tơkêa bro on tơhrik kơtâu ƀă khía a tơnêi kong, Khu pơkuâ hiăng djâ ƀăng tơnêi kố lo ing pơkâ pêi tơnêi kong.

Pêi pro mâu tơdroăng tơkêa bro on tơhrik kơtâu ƀă khía a Gia Lai ai hên tơdroăng

Pôa Nguyễn Văn Lộc, Kăn phŏ pơkuâ Khu pơkuâ ‘na kơmăi kơmok – tê mơdró tối ăm ‘nâi, Khu dế tơrŭm ƀă mâu kơvâ cheăng ƀă khu mơ’no liăn pêi pro mâu tơdroăng tơkêa bro on tơhrik kơtâu ƀă khía pơ’lêh, kêi đeăng pro mơ-éa tiô pơkâ:

“Mâu khu cheăng tơbleăng tối cho tung tơdroăng mơjiâng pro, hô sơ pâ mung tơnêi dế mơnhên, mâu kơ koan cheăng dế hriăn plĕng. Khu pơkuâ Kơmăi kơmok – tê mơdró dế tơbleăng tơtro ăm kong pơlê tơdroăng kố. Tơdroăng pêi  pro cho nhuô̆m luât, ngin pro tơ’lêi hlâu ăm khu mơ’no liăn cheăng tah lôi mâu tơdroăng pá puât teăm tơdrêng mâu tơmeăm troh chiâng tơmeăm mojiâng pro, mê ôh tá ai tơdroăng pro tơ’lêi hlâu tung mơjiâng pro ôh tá vâ tiô luât’’.

Kong pơlê Gia Lai dế tơkŭm tơleăng, tah lôi mâu tơdroăng ki ai

Tơdroăng tô tuăn ki ê a mâu tơdroăng tơkêa bro on tơhrik kơtâu ƀă khía kố cho tơdroăng xúa vâ chê 300 ngế pêi cheăng kong têa ê (ki hên cho mơngế kong têa Sinuâ) tá châ ăm mơ-éa phêp. Pôa Nguyễn Văn Lộc – Kăn phŏ pơkuâ Ƀơrô Vi ƀan kong pơlê Gia Lai tối ăm ‘nâi, hiăng ai mơ-éa ing Vi ƀan kong pơlê Gia Lai pơkâ mâu tíu cheăng tơkŭm tơleăng kơtăng tơdroăng kố. Tiô tơdroăng pêi cheăng mê cho, tâng khu tê mơdró ôh tá pro kêi đeăng hô sơ ăm mâu ngế rơkê kong têa ê tiô pơkâ, mê kong pơlê kô troh mơ’no tah mâu ngế pêi cheăng ôh tá ai mơ-éa ăm phêp:

“Kong pơlê hnê mơhno mâu kơ koan cheăng séa ngăn rêm hô sơ, rêm ngế ki lâi a hâi ki lâi, cho mâu ngế rơkê lơ mơngế pêi cheăng chêng kŏng vâ tơbleăng mâu pơkâ pơxâu phak liăn ƀă mơngế pêi cheăng ƀă khu tê mơdró xúa mơngế pêi cheăng. Ôh tá ai tŭm tiô pơkâ mê kô troh mơ’no tah. Hnoăng xiâm akố ‘na pơkuâ, séa ngăn mơ-éa phêp pêi cheăng mơngế pêi cheăng cho Khu pơkuâ cheăng pêi – Mô đô̆i rong râ – Rêh ối pơlê pơla, troh mơ’no tah lơ ôh cho kŏng an kong pơlê pơkâ. Laga xua tơdroăng kố dế pro hô sơ xua mê mâu tíu cheăng hiăng ai hlá đơn pâ pro mơdon hâi khế vâ tơleăng tơdroăng ki kố’’.

A Sa Ly tơplôu ƀă tơbleăng