VOV4.Sêdang - Tung hâi lơ 24/6, klêi kơ’nâi tơdroăng xo mơheăm khăm ngăn a kơpong klâ kơtăn, Tíu xiâm mơdât pơreăng kong pơlê Gia Lai mơnhên tơ’nôm 2 ngế dương tĭnh roh má 1 ƀă SARS-COV2, rơtế ối a pơlê Yon Tok, cheăm Ia Glai, tơring Čư̆ Sê. Péa ngế kố ing Bình Dương vêh a kong pơlê Gia Lai rơtế ƀă ngế tro tâ pơreăng má 13486. Khăm ngăn roh má 1 a hâi lơ 21/6 ăm hlo âm tĭnh ƀă SARS-COV2 ; khăm ngăn roh má 2 a hâi lơ 24/6 mê dương tĭnh ƀă SARS-COV2.

Nôkố ivá dêi péa ngế tro tâ pơreăng tơniăn lĕm, ôh tá kơ-o, tơngê ƀă dế châ pơtối séa ngăn. Tơdjâk 2 ngế dương tĭnh kố, mâu kơ koan cheăng kong pơlê Gia Lai hiăng xo mơheăm khăm ngăn 6 ngế F1 a mâu tơring Čư̆ Sê, Phú Thiện ƀă Krông Pa. Nôkố mâu tơdroăng khăm ngăn dêi tơring Čư̆ Sê, tơring Phú Thiện hiăng ăm hlo âm tĭnh. Thăm pêi pro tơdroăng hbrâ mơdât COVID 19, kong pơlê Gia Lai xuân dế pơtối tơdah ƀă pêi pro klâ kơtăn tơkŭm 449 ngế, tung mê ai 400 ngế tung tơnêi têa ƀă 49 ngế ing kong têa ê mot a tơnêi têa pin.

A Sa Ly tơplôu ƀă tơbleăng