VOV4.Sêdang - Hâi lơ 20/7, pơxiâm po hneăng hôp má môi – Kuô̆k hô̆i hneăng má XV. Hdrối mê, a Hngêi Kuô̆k hô̆i hiăng tơkŭm po roh hôp pơla Đảng khu râ kăn Kuô̆k hô̆i ƀă Khu pơkuâ cheăng Đảng Chin phuh. Mơnhên ‘na tơdroăng hbrâ hneăng hôp má môi, pôa Vương Đình Huệ, Kăn xiâm hnê ngăn Kuô̆k hô̆i tối, mâu kơ koan dêi Kuô̆k hô̆i, Vi ƀan pơkuâ Kuô̆k hô̆i ƀă Chin phuh, mâu khu xiâm, kơvâ cheăng, mâu kơ koan pêi ‘na luât hiăng tơrŭm krá tơniăn, mê hiăng châ môi tuăn ƀă mâu tơdroăng xiâm tơbleăng Kuô̆k hô̆i.

Drêng pơreăng COVID 19 xông tâ tú ó, Đảng, khu râ kăn Kuô̆k hô̆i hiăng pêi cheăng ƀă mâu kơ koan ki tơdjâk, tơbleăng Khu xiâm kal kí ƀă kô hôp tơkŭm a kơbong hôp Diên Hồng ƀă tiô tơdroăng kơdĭng chôu ƀă châ tơƀrê hên má môi, tơniăn má môi, tơdroăng Hneăng hôp kô pro chiâng iâ, tiô tối hdrối kô mơgêi a hâi lơ 31/7, pêi cheăng tá hâi pơtê.

‘Na troăng tơniăn ăm tâi tâng hneăng hôp, pôa Vương Đình Huệ tối rơdêi, Ƀơrô Chin phuh, Khu xiâm pơkuâ ngăn pơkeăng ƀă khăm pơlât hiăng mot pêi cheăng rĕng vâ hbrâ ăm hneăng hôp má môi, Kuô̆k hô̆i hneăng má XV. Tiô troăng tơniăn khât, troh nôkố tâi tâng mâu kăn teăng mâ Kuô̆k hô̆i ƀă ngế kum ăm Ƀơrô Kuô̆k hô̆i hiăng châ pâk vaccine, khăm pơlât, rak ngăn.

A Sa Ly tơplôu ƀă tơbleăng