VOV4.Sêdang - Hâi leh pế pơchên kơchâi mơnhên ki má môi tơnêi têa, tơdroăng kố tơkŭm po ƀă pế pơchên 100 kơchâi kâ ing kơchâi drêh – pôm – plâi ƀă reăng Đà Lạt châ tơkŭm po apoăng khế 4/2021 cho tơdroăng pêi ki pơxúa, po ăm hên tơdroăng kal phiu ro Festival Reăng Đà Lạt hơnăm 2021. Xêo troh hâi lơ 15/3/2021, tơdroăng kố hiăng mơhnhôk mâu ngế troh tơ’noăng cho ngế pế pơchên kế kâ, kĭ pế lối 100 túa kơchâi kâ; tung mê, bu krê ngế pế pơchên kế kâ a Lâm Đồng ai 77 ngế lo ing Đà Lạt, 17 ngế ing mâu tơring; ki ê cho ing mâu kong pơlê, pơlê kong kơdrâm tung lâp tơnêi têa.

Mâu ngế pế pơchên kế kâ ôh tá xê lo ing mâu hngêi pế pơchên kế kâ; mê ối lo ing mâu hngêi trung hnê cheăng pêi, tíu tê tơmeăm, tíu păn tơmeăm ƀă hía hé. Tơdroăng “100 kơchâi kâ ing kơchâi drêh ƀă reăng Đà Lạt” xua Khu pơkuâ Ôm hyô Lâm Đồng – Đà Lạt dó inâi LDTA tơkŭm po, cho roh vâ trâm mâ, hriâm túa ki rơkê tơtro ‘na pế pơchên kế kâ dêi mâu ngế pế pơchên kế kâ lâp lu; xuân môi tiah tơbleăng ƀă ki bô bối kơchâi drêh – pôm – plâi kâ ƀă reăng Đà Lạt.

A Sa Ly tơplôu ƀă tơbleăng