VOV4.Xơ Đăng - Roh hôp trâm leh tơbâ 43 hơnăm hâi ƀlêi trâng tơplâ tơkăng kong Peăng mâ hâi lu pá Hdroh ƀă rơtế khu lêng – kuăn pơlê Kul ƀlêi trâng rơxông kơdê hlâ long mơngế a Kul, mâu sinh viên kong têa Kul dế hriâm a pơlê kong kơdrâm. Tơdroăng ki kal xua Khu tơrŭm mâu khu tơrŭm cheăng pơlê kong kân Hồ Chí Minh tơkŭm po.

Xông tơpui a roh trâm mâ, pôa Sok Dareth, Kăn teăng mâ kong têa Kul a Pơlê kong kân Hồ Chí Minh mơnhên: Đảng, Tơnêi têa, kuăn pơlê ƀă khu lêng ki pleăng hnoăng cheăng Việt Nam hiăng kum ƀă pleăng tŭm tơmeăm khoăng vâ pêi pro hnoăng cheăng lâp plâi tơnêi, kum kuăn pơlê Kul hlŭn ing rơxông kơdê hlâ long mơngế a hâi lơ 7/1/1947 ƀă pơtối rak tơdroăng ki ai mâ a kong têa Kul vâ kum mơdât tơdroăng ki pơtối chiâng ai nếo rơxông kơdê hlâ long mơngế, xuân môi tiah tơdroăng tŏng kum tŭk têk tung tơdroăng vêh mơjiâng a kong têa Kul.

Kuăn pơlê kong têa Kul đi đo pâ mơnê hnoăng kơnía kố, ƀă đi đo pâ hâi lơ 7/1 cho ‘’hâi xông rêh má péa’’. Kố cho tơdroăng ki ai khât dêi tơdroăng mơnhông mơdêk ôh tá ai kơbố khên tối tơ-ê, mơnĕn lơ piu lôi.

A Sa Ly tơplôu ƀă tơbleăng