VOV4.Sêdang - Klăng leh tơbâ 96 hơnăm Hâi hlá tơbeăng Kăch măng Việt Nam lơ 21/6, hên khu râ kăn teăng mâ Khu xiâm, kơvâ cheăng tơnêi têa ƀă kong pơlê hiăng troh rơkâu khu râ kăn pơkuâ, kăn ƀô̆, ngế chêh hlá tơbeăng, ngế rah chêh hlá tơbeăng, ngế cheăng kih thuât dêi Rơ’jíu Việt Nam - VOV.

Troh lăm pôu ƀă rơkâu phiu ro Rơ’jíu Việt Nam, pôa Hầu A Lềnh, Ngế xiâm, kăn xiâm pơkuâ Vi ƀan hdroâng mơngế pói vâ, khu râ kăn pơkuâ Rơ’jíu Việt Nam ƀă kăn ƀô̆ ngế chêh hlá tơbeăng, ngế rah chêh hlá tơbeăng dêi Rơ’jíu Việt Nam pơtối tơrŭm, tŏng kum tơdroăng ki kal, pơtâng tối mâu troăng pơkâ pêi, troăng hơlâ troh vâi krâ hdroâng kuăn ngo tung la ngiâ.

Pôa Nguyễn Mạnh Hùng, Ngế xiâm pơkuâ tơdroăng kal tiô troăng um tơvi, rơ’jíu ƀă Internet troh lăm pôu ƀă rơkâu VOV mê tối, hlá tơbeăng mê thế tơbriât ƀă măng pơlê pơla; pơkâ cho kal pơ’lêh nếo túa pêi. Pôa Nguyễn Mạnh Hùng tối ăm ‘nâi, Khu xiâm pơkuâ tơdroăng kal tiô troăng um tơvi, rơ’jíu ƀă Internet kô tơleăng mâu tơdroăng ‘na mâu pơkâ, luât, troăng hơlâ vâ pro tơ’lêi hlâu ăm hlá tơbeăng mơnhông mơdêk.

Xuân tung hâi lơ 17/6, hên khu râ kăn teăng mâ mâu Khu xiâm, kơvâ cheăng, kơ koan, khu râ Tơnêi têa ƀă mâu kong pơlê, pơlê kong kân xuân hiăng troh Rơkâu Rơ’jíu Việt Nam môi tiah: Khu xiâm pơkuâ Kŏng an, Khu xiâm ngăn ‘na pêi cheăng Việt Nam, Khu xiâm tơpui kâ, Vi ƀan kong pơlê Hải Dương ƀă hía hé.

A Sa Ly tơplôu ƀă tơbleăng