VOV4.Sêdang - Tơdrốu khế apoăng hơnăm 2021, Dak Lak ai troh 650 rôh ko ‘nhiê kong ƀă hdi xo tơnêi kong ôh tá tro luât, châ vâ chê tơdế kơxô̆ rôh pro xôi luât rak vế ƀă mơnhông pêt kong tung lâp tơnêi. Kố cho tơdroăng ki ôh tá tơniăn, ăm hlo tơdroăng ko ‘nhiê kong a Dak Lak dế ôh tá tơniăn. Tiô riân ngăn dêi Khu rak ngăn loăng pơlái kuăn kiâ kong dêi kong pơlê Dak Lak, tung 6 khế apoăng hơnăm, lâp kong pơlê ai 590 rôh ko ‘nhiê kong ƀă 60 rôh hdi xo tơnêi kong ôh tá tro luât, ƀă tâi tâng ƀăng tơnêi kong ƀă tơnêi kong ki tro hía ai 207 ha.

Tơdroăng ko ‘nhiê kong, hdi xo tơnêi kong a Dak Lak dế ó

Tung mê, mâu kơ koan ki ai tơdjâk hiăng pơxâu phâk 390 rôh, rup xo vâ chê 260 met khô̆i loăng tŭm túa, 252 rơxế pro xôi, nâp liăn vâ chê 3 rơtal liăn. Ki rơhêng vâ tối, ai lối tơdế rôh ko ‘nhiê kong tung 6 khế hdrối nah a Dak Lak cho a tơring Krông Bông, môi tíu ki xiâm ‘na ko ‘nhiê kong dế châ rêm râ kơvâ cheăng dêi kong pơlê tơkŭm pơkâ tơleăng.

Katarina Nga tơplôu ƀă tơbleăng