VOV4.Sêdang - Kơxo lơ 2/7, tơkŭm po Hneăng hôp mơ’no tơdrêng tung um tơvi ‘na pơkuâ, mơjiâng kơpong hngêi kơmăi kơmok, châ tơdjêp ing tíu mơ’no hyôh um tơvi Hà Nội xua pôa Nguyễn Hồng Diên, Ngế xiâm pơkuâ kơmăi kơmok – tê mơdró pơkuâ, tơrŭm ƀă mâu kong pơlê, pơlê kong kơdrâm, kong pơlê vâ mơnhên mâu tơdroăng pá puât, tơvâ tơvân tung tơdroăng pêi cheăng mâu kơpong hngêi kơmăi kơmok tung pơla kố nah, ing mê, pơkâ mâu troăng pơkuâ krá tơniăn, châ tơƀrê mâu kơpong hngêi kơmăi kơmok tung la ngiâ.

Xua ga, tiô pơkâ troăng prôk la ngiâ troh hơnăm 2025 lâp tơnêi têa ai lối 1.704 kơpong hngêi kơmăi kơmok. Laga, tiô tơkŭm tơdroăng ing Khu pơkuâ ngăn Kơmăi kơmok – tê mơdró mâu kong pơlê, pơlê kong kơdrâm, troh tâi hơnăm 2020, lâp tơnêi têa ai 968 kơpong hngêi kơmăi kơmok ƀă tâi tâng ƀăng deăng 30.912 ha hiăng châ mơjiâng.

Ing tơdroăng pêi kâ dêi mâu khu tê mơdró tung kơpong hngêi kơmăi kơmok hiăng thăm pêi rĕng tơdroăng pơ’lêh cheăng kâ, laga xuân hlo mâu tơdroăng pá puât, ối tơvâ tơvân tung pơkuâ kal tah lôi; hên kong pơlê trâm pá, tơvâ tơvân tung tơdroăng pơ’lêh túa pêi kơpong kơmăi kơmok xua Tơnêi têa mơ’no liăn cheăng ăm khu tê mơdró mơ’no liăn cheăng mơjiâng ƀă tê mơdró hngêi trăng troăng klông ƀă hía hé. Kal khât mâu troăng vâ pơkuâ krá tơniăn mâu kơpong hngêi kơmăi kơmok tung la ngiâ.

A Sa Ly tơplôu ƀă tơbleăng