VOV4.Sêdang - Cho tung tơdroăng po leh tơbâ Hâi rơpŏng hngêi Việt Nam, kơxo 28/6, Tíu xiâm ngăn Khu vâi kơdrâi Việt Nam tơrŭm ƀă Tíu xiâm tí tăng ‘nâi plĕng ‘na rơpŏng hngêi ƀă khu kơdrâi, Mê Viê̆n Hàn Lâm Khoa hok xah hô̆i Việt Nam tơkŭm po hneăng hôp Khoa hok Tơnêi têa “Tơbleăng tơdroăng pơkâ Hneăng hôp má 13 xúa tung rêh ối: Mơdêk ki pơxúa dêi Rơpŏng hngêi Việt Nam - Châ ‘nâi ƀă Troăng hơlâ pêi pro”.

A hneăng hôp, teăng mâ mâu khu xiâm, kơvâ cheăng, mâu ngế rơkê tung tơdroăng ‘na on veăng rơpŏng hngêi ƀă ‘na vâi kơdrâi tơpui tơno, mâu tơdroăng hiăng tí tăng ‘nâi plĕng ‘na khoa hok ƀă túa pêi cheăng ‘na ki pơxúa dêi on veăng rơpŏng hngêi Việt Nam; tí tăng ‘nâi plĕng tối mâu tơdroăng pơxúa dêi rơpŏng hngêi ki xiâm gá, ki tơtro ƀă tơdroăng púi vâ dêi vâi kơdrâi xuân môi tiah tơtro ƀă tơdroăng cheăng pêi, tơdroăng pêi pro dêi Khu ngăn vâi kơdrâi Việt Nam.

Pakĭng mê, tối kô veăng hnê tối mâu tơdroăng mơhnhôk pêi pro ‘na on veăng rơpŏng hngêi ƀă mâu tơdroăng pơkâ ki nhên khât vâ tơbleăng tung la ngiâ. Hneăng hôp châ tơkŭm po tiô tơdroăng mơ’no tơdrêng a Hà Nội ƀă mơ’no tơdrêng tung lâp tơnêi têa ing SureMeet.

Gương tơplôu ƀă tơbleăng