VOV4.Sêdang - Tô tuăn drêng rế hía tơdroăng mơhno túa lĕm tro dêi hdroâng Jarai, 2 ngế o inâi cho Hà Kpăh H’Huyền prế Hồ Thị Hồng Nhung (Hgêi trung râ má pái phôh thong Plei Me, tơring Čư̆ Prong, kong pơlê Gia Lai) rơtế pêi pro tơdroăng tơkêa bro “Vêh mơnhên ki tơ-ƀrê dêi rak vế tơdroăng hơ’muăn Jarai ƀă um kơchuâ, hok tro râ má môi Jarai”. A roh tơ’noăng khoa hok kih thuât râ kong pơlê hok tro râ má 2 roh má VII (hơnăm hriâm 2020-2021), Tơdroăng tơkêa bro kố hiăng châ ối má môi.

Tơdế khế 3 tô mơdrăng, H’Huyền prế Nhung xuân tơ-uân chôu phut vâ tơbleăng tối mâu kơxop hlá mơ-éa hơ’muăn dêi Jarai ki mâu vâi o hiăng tí tăng chêh xo, rah chêh troh hên tâ ă hok tro Jarai a cheăm Ia Ga, tơring Čư Prong,  kong pơlê Gia Lai.

Tối dêi tơdroăng ki tơná khoh rah xo tơdroăng kố, H’Huyền tối: “Hdroâng Jarai cho kuăn pơlê ki rêh ối hiăng ton hơnăm a kong pơlê Gia Lai, ai hên tơmeăm khoăng ki kơnía git, mơhno túa lĕm tro. Maluâ ti mê, tơdrêng ƀă tơrŭm, tơmot ƀă hên khu hdroâng kuăn ngo, nhŏng o ki ê, mâu khôi túa, vêa vong kố rế hía rế vâ hía lôi. Ki ê nếo, tơmeăm khoăng văn hok tiô chal vâi krâ roh nah dêi mơngế Jarai ga ai hên túa la xuân tá hâi teăm châ ’mâi mơnhông tơtro tơdroăng.

H’Huyền prế Hồng Nhung hriăn plĕng tơdroăng tí tăng chêh hơ’muăn tối dêi mơngế Jarai

Cho môi ngế kuăn cháu dêi hdroâng Jarai, vâ pleăng dêi môi iâ hnoăng cheăng tơná veăng kum pơtối rak vế, chôu ‘măn, pơtối mơdêk ki kơnía dêi mâu tơdroăng hơ’muăn ki mê”. O Hồ Thị Hồng Nhung tối tiah kố: “Dế nôkố, a râ má môi xuân tá hâi teăm ngăn khât ‘na tơdroăng hnê mơhno tơdroăng pơtối rak vế tơdroăng ki kơnía git kố dêi hdroâng kuăn ngo ăm hok tro i hlê plĕng vâ rak ‘măn pơtối mơnhông. Xua ti mê, khu kố vâ chêh kơchuâ tơdroăng hơ’muăn dêi Jarai kố djâ ’mot tung tơdroăng hnê hriâm dêi râ má môi, rế vâ veăng kring vế, rak ngăn tơdroăng kơnía git dêi hdroâng kuăn ngo, rế vâ tơtro ƀă túa ki hơ’leh nếo tung tơdroăng hnê hriâm a hngêi trung phôh thong.

Tiô tơdroăng hnê djâ dêi thái Hoàng Việt Trung - Kăn pơkuâ hnê ngăn Đoân droh rơtăm dêi hngêi trung, H’Huyền prế Hồ Thị Hồng Nhung pơxiâm pêi mâu tơdroăng tơkêa bro kố ƀă tơdroăng ki kơdo mơ-eăm hên khât. H’Huyền tối ăm ‘nâi: Vâ séa mơnhên ngăn ki hlê plĕng dêi hok tro mơngế Jarai, khu kố  hiăng lăm mơnhên ngăn 300 ngế hok tro râ má môi tung tơring kố tiô kô phĭu êng mơnhên. Klêi mê, ăm hlo, tơdroăng ki hnê, ki hlê plĕng ‘na tơdroăng hơ’muăn ăm hok tro Jarai bu iâ. Bú ai 10,7% hok tro châ hmâng đi đo mâu tơdroăng hơ’muăn Jarai ing nôu pâ, jâ pôa lơ ing mâu vâi krâ. Ki ê to ton vâi bu tơmâng, lơ tơmâng bu iâ. Tơdroăng kố, pro mâu vâi o hok tro khoh kơdroh tơdroăng ‘nâi klê, hlê plĕng ‘na ki kơnía git dêi tơdroăng hơ’muăn hdroâng  Jarai, klêi mê, vâ pơtối rak vế tơdroăng hơ’muăn kố xuân pá puât ó khât.

Hà Kpăh prế Hồng Nhung hiăng châ pri mơhá dêi Hneăng tơ’noăng khoh hok kih thuât

Ngăn tiô kơ tơdroăng ki séa mơnhên ngăn ƀă tơdroăng ki ai hlâu, tơtro tiô khôi túa vêa vong dêi tơdroăng, 2 ngế hok tro ki mê hiăng tơmiât troh troăng hơlâ ki vâ pơtối châ ‘măn rak, chôu ‘măn tơdroăng hơ’muăn dêi hdroâng Jarai tiô kơ tơdroăng ki chêh kơchuâ um. Pakĭng 6 tơdroăng hơ’muăn dêi hdroâng Jarai ki vâi krâ hiăng hmâ hơ’muăn tối, ƀă châ rah xo mâu tơdroăng hơ’muăn mê ing Rơmah Del, Hồng Nhung ƀă H’Huyền hiăng mơhnŏng chêh xo tơ’nôm pá 4 tơdroăng hơ’muăn nếo. Kơ’nâi mê, mâu vâi o hiăng mơhnŏng chêh kơchuâ um, chêh tối ‘noăng chư ki tơtro ƀă mâu tơdroăng ki vâi o hok tro lâm 1 hlê plĕng. Tơdroăng hơ’muăn mê xŏn ai 53 kơtâ, xing xoăng châ 3 roh: hơ’muăn tối ‘na mâu kuăn kiâ, hơ’muăn tối ‘na tơdroăng rêh kâ ối ƀă hơ’muăn tối ‘na tơdroăng ki pơxêh krih tơviah.

Klêi kơ’nâi chêh kơchuâ um hơ’muăn, H’Huyền prế Hồ Thị Hồng Nhung hiăng lăm mơnhên ngăn ƀă tối pơtâng ăm mâu thái cô ki pơkuâ vâ mơnúa hnê tung mâu roh ki hriâm a lâm ƀă hok tro lâm 3, lâm 4, lâm 5. Klêi mê, hiăng hlo ai hên vâi pú hâk vâ khât kơ tơdroăng hơ’muăn tối ing tơdroăng chêh kơchuâ um kố, thăm nếo, nôu pâ, nhŏng o xuân hâk vâ; tơdrêng amê hnối tơkêa kô chêh xo hên tâ nếo tơdroăng hơ’muăn dêi kuăn ngo vâ rak vế, chôu ‘măn.

Thái Hoàng Việt Trung, kăn pơkuâ hnê ngăn Đoân droh rơtăm hngêi trung râ má pái Plei Me, tơring Čư̆ Prong, kong pơlê Gia Lai tối ăm ‘nâi: Tung 6 khế pơtối, thái ƀă hok tro rơtế ai môi hiâm tuăn, mơnhên tối hriăn plĕng, klêi mê hnối chêh tối chiâng tơdroăng hơ’muăn nếo, mơnúa pêi pro. H’Huyền prế Hồ Thị Nhung hiăng tí tăng chêh do lối 30 tơdroăng hơ’muăn dêi hdroâng mơngế Jarai. Maluâ ti mê, tung tơ’noăng khoa hok kih thuât nếo achê pơla kố, thái cô ƀă mâu vâi o hok tro hiăng djâ dêi 10 tơdroăng hơ’muăn tơtro ƀă hiâm tuăn mơno, khu rơxông dêi vâi o hok tro râ má môi. Drêng châ kâ pri ối má môi, thái cô ƀă hok tro hiăng hơniâp ro ƀă tâ ai tơdroăng ki ƀriê phoih tung hiâm mơno. Tiô tơdroăng châ ‘nâi, mâu tơdroăng hnê phôh thong ki nếo xuân ai tơ’nôm ƀă mâu tơdroăng hnê dêi kuăn ngo. Pói rơhêng vâ, kế tơmeăm kố dêi 2 ngế vâi o kô chiâng tơdroăng hnê hriâm ki ai pơxúa kân khât ăm hngêi trung râ má môi tung hngêi trung kố.

Hlá tơbeăng Gia Lai

Nhat Lisa tơplôu ƀă tơbleăng