VOV4.Sêdang - Hâi lơ 29/6, pôa Phạm Minh Chính, Ngế pro xiâm hnê ngăn tơnêi têa pơkuâ po rôh hôp Chin phuh ‘na tơdroăng mơjiâng luât khế 6/2021. Tiah mê, kô mơdoh 1 hâi vâ séa ngăn tơdroăng ki mơjiâng ƀă pêi pro luât vâ pêi pro tơdrêng pơkâ tơleăng mâu tơdroăng ki xơpá, tơvâ ‘na troăng hơlâ kum kuăn pơlê ƀă khu mơdró kâ tro tâ. Kố cho môi tung mâu hnoăng cheăng ki kal dêi Chin phuh.

A rôh hôp mâu kăn hiăng tơpui tơno, tơbleăng 8 tơdroăng ki kal: Tơdroăng tơkêa Luât kăn sat cơ đô̆ng; tơkêa Luât ki ‘mâi rơnêu, ‘mot tơ’nôm Phụ lục - Danh mục tơdroăng pơkâ riân ngăn tơnêi têa dêi Luât Riân ngăn; tơdroăng tơkêa Luât ki ‘mâi rơnêu, ‘mot tơ’nôm mâu tơdroăng dêi Luât rak xúa tuăn ngoâ rơkê; troăng hơlâ ‘mâi rơnêu Luât Tơnêi tơniú; tơdroăng tơkêa teăng pơ’lêh tơdroăng pơkâ 101 hơnăm 2005 dêi Chin phuh ‘na mơjiâng, hơ’lêh hngêi ối tơdjuôm; pơkâ tơleăng xơpá ăm tơdroăng pơkâ krâ camera; mơnhên tối klêi kơ’nâi mơjiâng troăng hơlâ, mơjiâng luât 6 khế apoăng hơnăm ƀă túa pơkâ, pêi pro hnoăng mâu khế mơ’nui hơnăm.

Môi tơdroăng ki rơhêng vâ tối a rôh hôp cho kơxop hlá mơ-éa pơkâ dêi Chin phuh ‘na troăng hơlâ tŏng kum mâu ngế pêi cheăng, mâu ngế ki xúa ngế ki cheăng ƀă mâu ngế ki trâm pá xua pơreăng kân COVID-19 ƀă tâi tâng kơxô̆ liăn dâng 26 rơpâu rơtal. ‘Na tơdroăng kố, pôa Phạm Minh Chính, Ngế pro xiâm hnê ngăn tơnêi têa pơkâ thế hriăn ngăn vâ rak vế troăng hơlâ tŏng kum mâu ngế ki kal châ tŏng kum, tung mê ‘mot tơ’nôm mâu ngế ki châ tŏng kum cho mâu ngế pêi cheăng tơniăn.

Katarina Nga tơplôu ƀă tơbleăng