Sap apoăng hơnăm troh nôkố, tơdroăng séa ngăn, tí tăng ngăn tơdrêng, pơkâ kơtăng, hlối veăng tơmâng dêi mâu Khu xiâm: Ngăn pơkeăng, pêi chiâk deăng ƀă mơnhông thôn pơlê, khu mơdró kâ, kŏng an, Khoa hok ƀă Kŏng ngê̆, Vi ƀan Măt trâ̆n tơnêi têa Việt Nam mâu kong pơlê, pơlê kong kơdrâm, kong kân, Khu ngăn kuăn pơlê pêi chiâk, Khu ngăn vâi kơdrâi  ƀă hên khu ki ê… rơtế veăng séa ngăn ‘na tơdroăng pêi krúa kế kâ xiâm rêi kế kâ ki pro, chêh inâi tơmeăm pro ôh tá tro pơkâ.

Tung 6 khế apoăng hơnăm kố, kơvâ ngăn pơkeăng pơlât hiăng tăng ngăn ai lối 232 rơpâu tíu pêi pro, châ ‘nâi ƀă hlo lối 15 rơpâu tíu pêi pro  xôi luât ‘na pơkâ pro krúa kế kâ, hiăng châ pơxâu lối 3 rơpâu 300 tíu ki pro xôi, tung mê pơxâu phâk liăn vâ chê 2 rơpâu 300 tíu pêi pro ƀă kơxô̆ liăn vâ chê 20 rơtal liăn, kơdroh tâi tâng vâ pơchông ƀă hơnăm 2023. Pakĭng pơxâu phâk liăn ối pơxâu phâk tơ’nôm ƀă pêi mâu tơdroăng tơkâ luâ xơpá, thế pơtê cheăng ƀă 16 tíu mơjiâng pro, 745 tíu pêi cheăng thế prâu tah mâu tơmeăm ki ôh tá krúa.

Mâu khu xiâm kơvâ cheăng hiăng tơrŭm ƀă mâu kong pơlê lê ki rak ngăn, pơxâu phâk tíu lâi nhôm pêi ôh tá krúa kế kâ, hnê mâu kong pơlê ki mê tơbleăng tơdroăng séa ngăn mâu tíu xiâm ki nhôm pro ‘mêi ôh tá krúa kế kâ, vâ tơniăn tơdroăng pêi krúa kế kâ, hbrâ mơdât tro hơ-ôu kế kâ, vâ tơniăn krúa kế kâ tung rôh leh kân. Tơdroăng tro hơ-ôu kế kâ, lâp tơnêi têa ai 70 ngế tro hơ-ôu, pro vâ chê 3 rơpâu ngế tro ƀă 12 ngế hlâ.

Jâ Phạm Khánh Phong Lan, Ngế pơkuâ ngăn xiâm rak tơniăn krúa kế kâ Pơlê kong kân Hồ Chí Minh ăm ‘nâi: tơdroăng tro hơ-ôu kế kâ ôh ta teăm ‘nâi rơ-iô tung tơdroăng pế pơchên hmê kâ ăm pú hên, pơchên kế kâ tung hâi ôu kâ pơkoăng, hâi mơdâm kiâ, a kuăn tê hmê, hngêi pế pơchên kế kâ ăm pú hên. Xơpá kân cho ai kơchơ ki vâi tăng mơdró tê mâu tơmeăm kế kâ ki ôh tá ăm phêp, malối tê online: 

‘’Ki xơpá kân má môi, malối cho klêi ai pơreăng tâ tú cho tơdroăng ki kơdrâ ai mâu kơchơ vâi tăng po tê mơdró xêh, ‘na mâu tíu tê mơdró ôh châ râ kăn kơpêng ăm phêp. Tơdroăng tê online tê tung măng xuân cho môi tung mâu tơdroăng ki ôh tá ăm phêp xua tung măng vâi tơbleăng tối tŭm tơdroăng la ôh tá krúa  lěm.  Pơlê kong kân xuân hiăng mơjiâng môi tôh pêi cheăng ki krê xêh, malối rơtâ tá kơpong mâu kơchơ xiâm, mâu ki tê mơdró lăm ngăn, tăng ngăn klêi mê á xo túa tơmeăm la pá kong,  vâi tối  tơbleăng tŭm tơdroăng hmâng vâ, hên tơmeăm ki ‘nâ xuân cho tơmeăm ing kơchơ mê âi, hlo mâu khu râ pơkuâ cheăng vâi kơxu dêi tơmeăm kơtâu châ tíu ê, tơdroăng séa ngăn, lăm ngăn mê xơpá  ‘nâng’’.

Ngế teăng mâ mâu Khu xiâm, kơvâ cheăng xuân tô tuăn ‘na tơdroăng lăm séa ngăn ôh tá ai tŭm mơngế, mâu troăng vâ pêi mơdêk tơƀrê tung tơdroăng lăm séa ngăn mâu tíu tê mơdró kế kâ ki pế iâ, kế kâ nô̆ng tê drô troăng kơphô̆ dế tơkŭm tơdroăng cheăng ăm kơ koan tơring, kong pơlê. Malối mâu tơmeăm ‘na têa tôu ro, drôu ƀiêr pá vâ séa ngăn, tơdjâk kân troh hnoăng ki pơxúa ƀă ki tơtro vâ ăm tro tiô luât dêi mâu khu mơjiâng pro ƀă mơngế rôe xúa. Pakĭng mê, mâu kăn tô tuăn tơdroăng hmếo tơpui tối tro dêi mâu tơmeăm kế kâ, tối ôh tá tro tung tơbleăng,  tơpui tơbleăng rơkê tối dêi tro. Teăng mâ Khu xiâm ngăn tơdroăng nếo ai ƀă hlá tơbeăng hyôh rơ ‘jíu tối tiah kố, thế mơdât ôh tá ăm tơbleăng luâ troh kong têa ê, mơdât xiâm ki tối ăm, pơxâu phâk khu ki xiâm, pơxâu phâk kơtăng tâ. Thế pơkâ ôh tá ăm phêp tơbleăng tê mâu tơmeăm ƀă điê̆n tưh, livestream tê tơmeăm mâu pơkeăng ki bro ing hlá nhâ, plâi pôm… ƀă hên tơmeăm ki ê.

Tiô Thiếu tướng Nhữ Thị Minh Nguyệt, Ngế xiâm Phŏ pơkuâ Kăn sat tơplâ mơdât mâu ki xôi ‘na hyôh kong prâi, Khu xiâm Kŏng an, tơdroăng tê mơdró kế kâ ôh tá ‘nâi xiâm ulâi, rak ngăn kế kâ ôh tá tơniăn, tơbleăng tê mâu kế kâ ôh tá ‘nâi xiâm mơjiâng pro ôh tá krúa kế kâ. Tơdroăng mâu ki xúa vâ pro pơxúa ăm tơná tung măng, tê mơdró ƀă điê̆n tưh, rế hlo hên nôkố. Mâu ngế ki tê xúa mâu kế kâ tơmeăm ôu ki ôh tá ‘nâi xiâm ulâi, tah tíu ki chêh pơkâ hâi khế hơnăm chiâng xúa… tơdroăng tê mơdró online pro hên tơdroăng xơpá tung tơdroăng séa ngăn, pơxâu phâk, Thiếu tướng Nhữ Thị Minh Nguyệt tối:

‘’Ngin xuân pâ thế Chin phuh rê̆ng ‘mâi hơ’lêh tâi tâng tơdroăng rak ngăn tơnêi têa ‘na pro tơniăn krúa kế kâ tiô troăng tơtro má môi ai môi tíu xiâm ing Tơnêi têa troh a pơlê cheăm, vâ tơniăn xiâm ki mơjiâng pro ƀă vâ tơniăn hnoăng cheăng rak ngăn dêi tơrêm kơvâ cheăng, tơrêm râ malối cho pơkâ hnoăng cheăng i nhên tung rak ngăn mâu tơdroăng pêi pro tê mơdró kế kâ ki u ối hên tơdroăng xôi  ƀă mơni kô ôh tá pêi krúa kế kâ môi tiah nôkố. Mê cho pêi pro tê mơdró iâ tơmeăm, mơdró kŭn, mâu kế kâ ki lăm nô̆ng tê drô troăng kơphô̆ ƀă tơdroăng pế drôu krê dêi a hngêi, hdrối kố nah ai hên ngế tro hơ-ôu ai tơdroăng ki chiâng hlâ mơngế xua ôu drôu ki vâi tăng pế xêh’’.

A rôh hôp, pôa Lê Thành Long, Ngế pro xiâm phŏ hnê ngăn tơnêi têa tối, tơdroăng séa ngăn hôm pêi krúa tơmeăm kế kâ hiăng mơ-eăm hên ƀă hlo hiăng tơƀrê. Mâu troăng hơlâ pơkâ dế prôk tro troăng mơhno ƀă pơtối pêi pro. La xuân ối hên ki pá, tơvâ tơvân, mơni ôh tá tơniăn krúa kế kâ, tơdroăng tro hơ-ôu kế kâ, kơxô̆ mơngế pro xôi luât rế tâk, luât pơkâ pơxâu phâk hâi tơxâng vâ rơnêu pât. Pôa Lê Thành Long, Ngế pro xiâm phŏ hnê ngăn tơnêi têa pơkâ thế:

‘’Á hlo tiah kố cho tơniăn krúa kế kâ, tơdoăng ki hlê plê̆ng dêi kuăn pơlê, tơdroăng hmâ ƀă bú dâng mê tê tối cho túa lê̆m tro trung tơdroăng rôe xúa tơmeăm, mê nếo cho krá tơniăn ton, mơhế mâu kăn lăm séa ngăn pơtối tâk tơ’nôm 10 hdroh mơngế lăm ngăn a tơrêm tíu mơni ôh tá hâi kâi séa ngăn tơƀrê. Pro ti lâi vâ chiâng hmâ ƀă mơhno ăm mâu ngế ki rôe xúa tơmeăm rơkê mê cho ki kal. Hlối ai pơxúa ‘na ngiâ ƀă hlối ai pơxúa troh ta ah. Vâ tối mâu khu xiâm, kơvâ cheăng tung tơdroăng rah xo hnoăng cheăng tơná ƀă xiâm tơná vâ mơdêk hnoăng cheăng séa ngăn tơdrêng ƀă drêng châ ‘nâi kô thế pơxâu kơtăng, hlối tơbleăng tối ‘na ki mê vâ thế rêm ngế ‘nâi hrâ rơnáu xêh”.