Kơvâ ngăn pơkeăng ƀă khăm pơlât Kon Tum dế thăm pêi pro tơdroăng hbrâ, mơdât pơreăng ôh tá ăm chiâng pơreăng kân. Khế 8 pơla kố nah kơvâ ngăn pơkeăng ƀă khăm pơlât kong pơlê Kon Tum châ hlo ai 71 ngế tro tâ pơreăng tơngê lo mơheăm tâk 20 ngế tâng pơchông ƀă khế hdrối. Tíu châ hlo hên ngế tro tâ pơreăng má môi cho tơring Kon Rẫy ƀă 26 ngế ƀă 8/10 tơring, pơlê kong kơdrâm dêi kong pơlê ai ngế tro tâ pơreăng.

Tiô ƀok thái pơkeăng chuyên khoa II Đỗ Ngọc Hoà, Kăn phŏ pơkuâ ngăn pơkeăng ƀă khăm pơlât kong pơlê Kon Tum, pơreăng tơngê lo mơheăm tung kong pơlê ôh tá tiô hneăng 3 hơnăm ai môi roh pơreăng xông tâ tú kân mê hơnăm ki lâi xuân ai ƀă ôh tá ai tiô rơnó. Nôkố kong pơlê Kon Tum dế ai mâu roh kong mêi ton, pro kong prâi tơ’lêi hlâu ăm kiâ ngu ngĕng, oâ ki chiâng tri trô, tơ’lêi chiâng xông tâ tú pơreăng tơngê lo mơheăm.

Kơvâ dế thăm pêi tơdroăng hbrâ, mơdât pơreăng tơngê lo mơheăm, tơkŭm po kơdê kiâ ngu ngĕng, kơdê kiâ ki chiâng tro trôu tung kong prâi.