Bú tung 2 khế apoăng hơnăm 2024, Krông Pač hiăng ai 3 ngế hlâ xua pơreăng kôk rơxok, cho tơring ai kơxô̆ mơngế tro tâ pơreăng kôk rơxok hên má môi a kong pơlê Dak Lak. Pôa Y Doãn Niê, Kăn phŏ hnê ngăn Vi ƀan tơring Krông Pač tối, tơdroăng hbrâ mơdât kôk rơxok dêi tơring trâm hên xơpá xua hên rơpŏng păn chó, miếo ôh tá vâ tơrŭm bă kơ koan khu râ pơkuâ cheăng tung tơdroăng hbrâ mơdât pơreăng:

“Kuăn pơlê păn chó miếo tung tơring ki hên cho kơ’nêi ăm prôk hmâng vâ a chiâk deăng, kăn ƀô̆ ngăn pơlât mơnăn hên hdrối troh vâ pâk mơdât pơreăng la rơpŏng hngêi ôh tá châ rup mơhnŏng ôh tá ăm pâk vaccine”.

A pơlê kong kơdrâm Ƀuôn Ma Thuột lơ mơhé tíu ki lâi tung kong pơlê Dak Lak sap ing pơlê cheăm troh pơlê kân, troh kơphô̆ xuân hlo mâu chó lo lăm prôk pá gong. Tơdroăng kố, mơhno xiâm ki rơ-iô ƀă mâu ngế ki prôk drô troăng. Nâ Trịnh Thị Hồng Hạnh, ối a bêng Tân Lợi, pơlê kong kơdrâm Ƀuôn Ma Thuột xâu khât tối xua hdrối nah hiăng tro chó kâ: 

“Kơtăn kố môi măng tĭng á prôk chêng lăm kơchơ, dế prôk kơdrâ hlo môi to chó lo a hơlâ troăng. Ôi xâu ‘nâng drêng mê a kâi kơ xâu, tơdroăng ki apoăng drêng á hlo á kơtâu, á rế kơtâu chó rế rơdât tiô pá rŏng ngăn cho krá ‘nâng môi tiah vâ kâ. Hlo chó vâi kơ’nêi hmâng vâ a xâu ‘nâng’’.

Tung rêm hơnăm, Dak Lak ai dâng 6.000 ngế tro chó kâ, miếo kơpúa thế lăm pâk pơkeăng hbrâ mơdât pơreăng. Krê to apoăng hơnăm  kố, kong pơlê ai 4 ngế hlâ xua tro pơreăng kôk, rơxok.

Pôa Đỗ Xuân Dũng, Kăn phŏ pơkuâ ngăn ‘na chiâk deăng ƀă mơnhông thôn pơlê dêi kong pơlê Dak Lak ăm ‘nâi, ki xiâm dêi pơreăng kôk, rơxok rế tâk cho xúa hâi rak ngăn krâu khât mâu chó, miếo. Kơxô̆ chó, miếo ki pâk vaccine hbrâ mơdât pơreăng kôk, rơxok ối iâ, bú 37%. Ki ê cho tơdroăng xúa mâu luât pơkâ pơxâu phâk xối luât ‘na rak ngăn chó, miếo,  pâk vaccine mơdât kôk, rơxok ăm chó, miếo hâi pêi kơtăng:

“Sap hdrối nah hâi hlo tíu pêi cheăng ki lâi mơngế ki lâi tro pơxâu phâk lơ lôi chó miếo châ kâ, kơpúa. Luât mê ai la pin oh tá pêi pro. Pakĭng hnê tối tơbleăng ‘na tơdroăng hbrâ mơdât kôk, rơxok mê kal thế pêi kơtăng luât ki pơxâu phâk. Mâu ngế ki lâi păn chó, miếo ôh tá vâ pêi pro tro tiô tơdroăng hiăng pơkâ dêi luât ối châ ăm chó, miếo châ kâ vâi  mê kơ koan khu râ pơkuâ cheăng kô tí tăng ngăn séa ngăn tơdroăng ‘na pơxâu phâk mâu ngế păn chó, miếo tro tiô tơdroăng hiăng pơkâ”.

Tiô pôa Nguyễn Thiên Văn, Ngế phŏ pơkuâ hnê ngăn Vi ƀan kong pơlê Dak Lak, vâ kơdroh ki tơ’lêi tâ tú kôk, rơxok xuân môi tiah kơdroh mơngế ki hlâ xua tro pơreăng kôk, rơxok, mâu khu râ kơvâ cheăng ƀă mâu kăn kong pơlê kal tơkŭm tŭm tơdroăng vâ pêi kơtăng mâu pơkâ hbrâ mơdât kôk, rơxok ki kong pơlê hiăng pơkâ. Tung mê, thế mơdêk hnoăng cheăng rak ngăn mâu chó, miếo, pâk vaccine hbrâ mơdât kôk, rơxok, hlối mơdêk tơdroăng hnê ăm kuăn pơlê hlê nhên ki rơ-iô  pơreăng kôk rơxok. Pôa Nguyễn Thiên Văn tối, kuăn pơlê hlê ƀă pêi pro tro cho khuă ki xiâm vâ pêi châ tơƀrê tơdroăng brâ mơdât pơreăng kôk, rơxok.

“Mâu pơlê cheăm tơring tung kong pơlê thế tơmâng khât hnê tối ăm kuăn pơlê tung vâ kuăn pơlê hlê nhên ki rơ-iô dêi pơreăng rơxok ƀă kuăn pơlê. Mơngế ki păn chó, miếo, thế rak vế pêi pro tro tơdroăng pâk vaccine hbrâ mơdât ăm chó, miếo. Drêng tro chó, miếo kâ thế lăm troh a kơ koan khăm, pơlât teăm tơdrêng’’.

Dak Lak dế tung pơla rơnó tô mơdrăng, cho rôh ki tơ’lêi vâ pơreăng kô rơxok a chó, miếo tâ tú, pro rơ-iô ăm kuăn mơngế. Xua mê, tơdrêng ƀă tơdroăng tơmâng pêi kơtăng dêi mâu kơ koan khu râ pơkuâ cheăng, kuăn pơlê kal mơdêk hlê plĕng tung hbrâ mơdât pơreăng vâ kơdroh pơreăng kôk, rơxok.