Pơlê kong kân Hồ Chí Minh tơrŭm mơdêk tơdroăng cheăng tơƀrê tung khăm pơlât kơpong Tây Nguyên
Thứ bảy, 10:00, 06/04/2024
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV4.Xơ Đăng - Vâ mơdêk ki tơƀrê tung khăm pơlât ăm kuăn pơlê a kơpong Tây Nguyên, kơdroh ki hâ ho a mâu hngêi pơkeăng a Pơlê kong kân Hồ Chí Minh, kơvâ ngăn pơkeăng Pơlê kong kân Hồ Chí Minh ƀă mâu kong pơlê kơpong Tây Nguyên hiăng môi tuăn tơbleăng hên tơdroăng cheăng tơhrâ tơrŭm mơnhông tơƀrê.
Ing mê, Khu ngăn pơkeăng Pơlê kong kân Hồ Chí Minh kô tơrŭm ƀă kơvâ ngăn pơkeăng mâu kong pơlê Tây Nguyên tung tơdroăng mơdêk ivá cheăng, pêi tơƀrê tung plâ mơdât pơreăng; Kum hnê kih thuât pơla mâu Hngêi pơkeăng kân, hngêi pơkeăng pơlât ki mơ’nui tung pơlê kong kân Hồ Chí Minh ƀă mâu Hngêi pơkeăng tung kơpong Tây Nguyên.
Pôa Nay Phi La, Ngế pơkuâ ngăn pơkeăng pơlât Dak Lak ăm ‘nâi, klêi môi tuăn mâu tơdroăng tơrŭm cheăng, khu xiâm kố hiăng ai hlá mơ-éa hnê mơhno mâu hngêi pơkeăng mơjiâng pơkâ nhên vâ tơbleăng pêi tơƀrê tơdroăng tơrŭm. Tiố tối hdrối sap 3 troh 6 khế, kơvâ ngăn pơkeăng pơlât Dak Lak kố pêi hnoăng cheăng mâu kih thuât ki trâu tâ ki Pơlê kong kân Hồ Chí Minh hiăng ƀă dế pêi pro.
Viết bình luận