VOV4.Xơ Đăng - Kơxê lơ 6/1, a Hà Nội, Khu tơrŭm cheăng Việt Nam, Khu tơrŭm cheăng pơla Việt Nam - Ấn Độ tơrŭm ƀă Kăn teăng mâ Ấn Độ  a Việt Nam tơkŭm po leh tơbâ 50 hơnăm hâi mơjiâng tơrŭm cheăng tơpui kâ Việt Nam - Ấn Độ. Troh veăng ai jâ Võ Thị Ánh Xuân, Kăn xiâm phŏ hnê ngăn tơnêi têa. Pôa Nguyễn Mạnh Hùng, Ngế xiâm pơkuâ tơdroăng kal tiô troăng rơ’jíu, um tơvi ƀă Internet, Kăn hnê ngăn Khu tơrŭm cheăng Việt Nam - Ấn Độ mơnhên Khu tơrŭm cheăng Việt Nam - Ấn Độ ƀă mâu khu tơrŭm Việt Nam tơrŭm krá tơniăn ƀă mâu khu tơrŭm cheăng Ấn Độ ƀă mâu kơ koan ki tơdjâk dêi péa tơnêi têa, thăm tơrŭm tâ mê nếo mâu tơdroăng trâm mâ kuăn pơlê, rak vế ƀă pro thăm pêng păm tơdroăng tơrŭm cheăng.

Ing mê kum thăm tơrŭm cheăng ton xŏn tŭm têk pơla Việt Nam – Ấn Độ mơnhông mơdêk a ‘ngêi tâ, tơxâng tơdroăng pơxúa dêi kuăn pơlê péa tơnêi têa. Xông tơpui a roh leh, jâ Võ Thị Ánh Xuân pơkâ thế, mâu kơ koan, khu tơrŭm cheăng, khu tê mơdró ƀă kuăn pơlê péa tơnêi têa kal tơrŭm krá tơniăn tâ mê nếo, mơnhông mơdêk tíu cheăng, hnoăng cheăng ƀă tơmeăm ki mơnhông dêi péa tơnêi têa, xúa tơtro mâu roh tơ’lêi tơrŭm cheăng.

Pêi pro tơtro tơdroăng pêi cheăng hơnăm 2021 – 2023 po rơdâ tơrŭm cheăng ton xŏn ƀă troăng pêi la ngiâ tơdjuôm ‘na hơniâp lĕm, mơnhông mơdêk châ tơƀrê ƀă kuăn pơlê hiăng châ tơbleăng ăm pêi pro a khế 12/2020.

A Sa Ly tơplôu ƀă tơbleăng