VOV4.Sêdang - Kơxê lơ 15/6, klăng leh tơbâ 96 hơnăm hâi Hlá tơbeăng Kăch măng Việt Nam lơ 21/6, a Hngêi Kuô̆k hô̆i, Ƀơrô Kuô̆k hô̆i hiăng trâm mâ ƀă pêi cheăng ƀă kăn teăng mâ mâu kơ koan chêh hlá tơbeăng. Troh veăng ƀă xông tơpui a roh trâm mâ, pôa Vương Đình Huệ, Kăn xiâm hnê ngăn Kuô̆k hô̆i tối rơdêi hnoăng dêi khu chêh hlá tơbeăng tung tơdroăng dêi Kuô̆k hô̆i cho kal khât.

Cho kơ koan kuăn pơlê rah xo, kơ koan kăn teăng kân má môi dêi kuăn pơlê lâp tơnêi têa, tâi tâng tơdroăng ‘na tơkŭm po, pêi cheăng dêi Kuô̆k hô̆i ôh tá chiâng troh ƀă kuăn pơlê tâ phĭu ƀă Kuăn pơlê tung lâp tơnêi têa ƀă kuăn pơlê pin ki rêh ối a kong têa ê tâng ôh tá ai tơdroăng veăng kum dêi mâu kơ koan thŏng tâ̆n hlá tơbeăng. Ing hlá tơbeăng, kuăn pơlê tâ phĭu châ séa ngăn tơdroăng pêi cheăng dêi Kuô̆k hô̆i ƀă vêh tơrôu, mâu “tơmeăm” dêi Kuô̆k hô̆i ‘na luât, séa ngăn ƀă pơkâ mâu tơdroăng ki kal dêi tơnêi têa xuân ôh tá chiâng pêi pro tung tơdroăng rêh ối tâng tơdroăng rêh ối ôh tá mot tung mâu tơdroăng pêi cheăng dêi Kuô̆k hô̆i.

Môi tuăn ƀă mâu rơkong tơpui dêi khu râ kăn pơkuâ mâu kơ koan chêh hlá tơbeăng, tung la ngiâ, pôa Vương Đình Huệ tối nhên, tơdroăng ki lâi xuân ai pơxúa ăm troăng hơlâ kuăn pơlê rêh ối, tro ƀă troăng hơlâ dêi Đảng, luât dêi Tơnêi têa, ai pơxúa ăm kuăn pơlê mê hlá tơbeăng kal tơkŭm pơtâng tối.

A Sa Ly tơplôu ƀă tơbleăng