VOV4.Sêdang - Kơxê lơ 1/7, a Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, kăn xiâm hnê ngăn tơnêi têa, kăn pơkuâ Khu hnê mơhno cheăng mơjiâng tơdroăng tơkêa hiăng ai rôh pêi cheăng ƀă mâu yăo sư, phŏ yăo sư, tiê̆n sih, mâu khu ki rơkê tung kơvâ cheăng khoa hok pơkâ luât vâ hmâng ƀă veăng tơpui tối tung tơdroăng tơkêa cheăng tung la ngiâ Mơjiâng ƀă pêi pro klêi tơnêi têa luât pơkâ Xah hô̆i chuh ngiah.

Tơpui a rôh pêi cheăng, pôa Nguyễn Xuân Phúc, kăn xiâm hnê ngăn tơnêi têa tối nhên, tơkêa cho “tơdroăng ki xiâm” tung tơdroăng ki hơ’lêh luât, pơtối mơjiâng tơnêi têa luât pơkuâ xah hô̆i chuh ngiah Việt Nam. Tung tơdroăng ki mê, kăn xiâm hnê ngăn tơnêi têa pơkâ thế mâu khu ki rơkê plĕng, khu ki hriăn ‘na khoa hok veăng tơpui tối tung mâu tơdroăng ki xiâm môi tiah dêi tơdroăng tơkêa; ‘na ki kal, đề cương dêi Tơkêa; ‘na tơdroăng ki hriăn ngăn; ‘na mâu tơdroăng pơkâ trâu hơngế dêi Tơkêa; tơdroăng ki xing xoăng mâu kơ koan pêi pro mâu tơdroăng cheăng ƀă mâu tơdroăng kal ki ê ki mâu khu ki rơkê plĕng, khu ki hriăn ‘na khoa hok rơhêng vâ veăng tơpui tối.

Kăn xiâm hnê ngăn tơnêi têa tối nhên, mâu rơkong veăng tơpui tối a rôh pêi cheăng rôh kố kô châ tơmâng tŭm tung pơla pêi klêi túa pơkâ mơjiâng tơdroăng tơkêa. Khu hnê mơhno cheăng kô pơtối pâ thế mâu khu ki rơkê plĕng, khu ki hriăn ‘na khoa hok, po lâm mâu rôh hôp tơpui tung mâu kơvâ cheăng ki ê vâ tơmâng mâu rơkong ki veăng tơpui tối tung tơdroăng tơkêa.

Nga tơplôu ƀă tơbleăng