VOV4.Sêdang - Pơtối roh lăm pôu ƀă pêi cheăng a mâu kong pơlê Tây Nguyên, hâi lơ 1/7, pôa Vương Đình Huệ, Kăn xiâm hnê ngăn Kuô̆k hô̆i hiăng pêi cheăng ƀă khu râ kăn pơkuâ kong pơlê Dak Nông. Xông tơpui a roh pêi cheăng, pôa Vương Đình Huệ kheăn kơdeăn kong pơlê Dak Nông hiăng tơkŭm po châ tơƀrê roh tâ phĭu rah xo kăn teăng mâ Kuô̆k hô̆i ƀă kăn teăng mâ Hô̆i đong kuăn pơlê mâu râ; klêi kơ’nâi Hneăng hôp Đảng, kong pơlê hiăng rah tŭm tâi tâng khu kăn ƀô̆ mâu râ ing kong pơlê, tơring troh cheăm; pêi pro tơdroăng pơkâ Hneăng hôp Đảng lâp tơnêi têa roh má XIII ƀă Pơkâ Hneăng hôp Đảng ƀô̆ kong pơlê roh má XII krâu khât.

Tơdrốu khế apoăng hơnăm kố, tơdroăng cheăng kâ, rêh ối pơlê pơla dêi kong pơlê hiăng tơniăn, pơtối tơtêk 6,03%, kố cho tơdroăng mơ-eăm hên khât, tâng pơchông ƀă tơdjuôm lâp tơnêi têa; pêi lo liăn ngân châ 58%. Pôa Vương Đình Huệ tối nhên, drêng kâi mơdât pơreăng, kong pơlê Dak Nông ai roh mơnhông tơtêk rĕng, thăm tơrŭm kơpong, tơdjêp pơla mơjiâng pro – kal vâ, thăm mơ’no liăn cheăng; mơjiâng tơdroăng tơkêa bro vêh mơnhông kơvâ pêi chiâk deăng, mơjiâng mâu tơmeăm ki kơnâ liăn.

Kăn xiâm hnê ngăn Kuô̆k hô̆i pêi cheăng khu râ kăn pơkuâ kong pơlê Dak Nông

Môi tung mâu tơdroăng ki má môi dêi Dak Nông tung pơla kố nah, mê cho tơdroăng kuăn pơlê xĕn ối hmâng vâ, pôa Vương Đình Huệ tối nhên, kong pơlê kal mơjiâng chiâng môi tơdroăng xiâm, tơleăng a péa tơdroăng, troăng prôk ƀă troăng troh.

Kăn xiâm hnê ngăn Kuô̆k hô̆i pêi cheăng khu râ kăn pơkuâ kong pơlê Dak Nông

Xuân tung hâi lơ 1/7, pôa Vương Đình Huệ ƀă khu râ kăn pêi cheăng hiăng troh lăm pôu ƀă diâp tơmeăm ăm kăn ƀô̆, mâu kŏng an kong pơlê Dak Nông. Tơdroăng pêi kố hiăng mơgêi roh pêi cheăng dêi pôa Vương Đình Huệ ƀă khu râ kăn pêi cheăng a mâu kong pơlê Tây Nguyên.

          A Sa Ly tơplôu ƀă tơbleăng