VOV4.Sêdang - Kơxê lơ 13/6, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng pơkuâ hâi pêi cheăng ƀă Vi ƀan mâu tơdroăng rêh ối pơlê pơla, mâu kơ koan dêi Kuô̆k hô̆i ‘na tơdroăng pơkâ tŏng kum mâu ngế pêi cheăng ki chiâng ôh tá ai cheăng pêi xua tơdjâk pơreăng COVID-19. Klêi tơmâng hnê tối tơbleăng dêi mâu ngế tung mâu kơ koan Kuô̆k hô̆i, Chin phuh, pôa Vương Đình Huệ, Ngế cheăng tung Vi ƀan mâu tơdroăng rêh ối pơlê pơla pơtối po ngăn mâu tơdroăng tơbleăng mâu pơkâ dêi Kuô̆k hô̆i ƀă Chin phuh ing mâu ƀâng Hô̆i đong hnê ngăn mâu kong pơlê; hlối thế Chin phuh rĕng tối mơgêi mâu tơdroăng tŏng kum ăm mâu ngế xua tơdjâk COVID-19.

Kăn xiâm hnê ngăn Kuô̆k hô̆i pêi cheăng 'na tŏng kum Covid 19

Vâ veăng pêi pro tơ-ƀrê mâu luât pơkâ mơnhông cheăng kâ - rêh ối tối tơchoâm ƀă troăng hơlâ pơkâ tŏng kum mâu ngế tâ COVID-19 tối krê, pôa Vương Đình Huệ, Kăn xiâm hnê ngăn Kuô̆k hô̆i thế, Chin phuh rĕng ai hlá mơ-eá chêh mâu tơdroăng cheăng pêi ki tâk, mơdêk ăm liăn vâ ‘no pêi cheăng dêi tơnêi têa tung la ngiâ; pơtối ‘mâi hơ’lêh tơdroăng liăn cheăng tê mơdró, mơnhông cheăng tê mơdró krê dêi kuăn pơlê, tơdroăng cheăng kâ kơxô̆ ƀă tơdroăng cheăng kâ tung tơnêi têa; rĕng tơbleăng pêi tơƀrê tơdroăng Pơkâ hneăng Hôp Đảng má 13 xúa tung rêh ối.

Gương tơplôu ƀă tơbleăng