VOV4.Sêdang - Kơxo lơ 30/6, a Pơlê kong kơdrâm Ƀuôn Ma Thuột, kong pơlê Dak Lak hiăng po rôh hôp má môi, Hô̆i đong hnê ngăn kong pơlê hneăng má 10, hơnăm 2021 – 2026. Pôa Vương Đình Huệ, kăn xiâm hnê ngăn Kuô̆k hô̆i veăng a rôh pơxiâm po hneăng hôp. A rôh hôp kố, Vi ƀan tâ phĭu kong pơlê Dak Lak hiăng mơnhên hiâm mơno dêi 75 ngế kăn Hô̆i đong hnê ngăn kong pơlê hneăng má 10, hneăng hơnăm 2021 – 2026; tơdrêng amê hnối pôk pôa Y Vinh Tơr, kăn phŏ hnê ngăn Thương trưk Hô̆i đong hnê ngăn kong pơlê Dak Lak hneăng má 9 pro kăn hnê ngăn Vi ƀan kong pơlê ƀă kơxô̆ phĭu pôk châ 98,66%. Pôk pôa Phạm Ngọc Nghị, kăn hnê ngăn Vi ƀan kong pơlê hneăng hơnăm 2016 – 2021 vêh pro kăn hnê ngăn Vi ƀan kong pơlê Dak Lak hneăng hơnăm 2021 – 2026 ƀă kơxô̆ phĭu pôk châ 100%.

Kăn xiâm hnê ngăn Kuô̆k hô̆i veăng hôp a rôh pơxiâm po hneăng hôp Hô̆i đong hnê ngăn kong pơlê Dak Lak

Tơpui a rôh hôp, pôa Vương Đình Huệ, kăn xiâm hnê ngăn Kuô̆k hô̆i tối nhên, kăn Hô̆i đong hnê ngăn kal mơdêk tơdroăng ki djâ troăng, khên tơmiât, khên pêi, khên pôu râng dêi hnoăng cheăng dêi ngế kăn ƀă kuăn pơlê; malối cho tơdroăng ki hbrâ rơnáu, rơkê plĕng, hơ’lêh nếo tung tơdroăng séa ngăn, kơ-êng, trâm mâ kuăn pơlê, tơdah kuăn pơlê, veăng ăm rơkong tơpui tối mơjiâng luât.

Pôa Vương Đình Huệ pơkâ thế, tung hneăng hơnăm 2021 – 2026, Hô̆i đong hnê ngăn kong pơlê Dak Lak hneăng má 10 kal pơtối hơ’lêh nếo rơdêi, mơdêk ki rơkê plĕng ƀă tơƀrê tâ nếo, pơtối ăm Dak Lak chiâng môi tung mâu tíu ki mơdêk cheăng kâ, ai ivá ki hơniâp ro, tơdjâk tung kơpong cheăng kâ a Tây Nguyên.

Katarina Nga tơplôu ƀă tơbleăng