VOV4.Sêdang - Kơxo lơ 14/6, a Hngêi hôp Kuô̆k hô̆i, pơxiâm po rôh hôp má 57 dêi Vi ƀan pơkuâ Kuô̆k hô̆i. Tơpui a rôh pơxiâm po, pôa Vương Đình Huệ, kăn xiâm hnê ngăn Kuô̆k hô̆i tối nhên tơdroăng ki kal châ Vi ƀan pơkuâ Kuô̆k hô̆i ăm rơkong veăng tơpui tối a rôh hôp 57 cho mơnhên tối klêi kơ’nâi pêi pro túa pơkâ mơnhông mơdêk cheăng kâ rêh ối pơlê pơla ƀă rak liăn ngân tơnêi têa ki ‘no hrê tung pơla 6 khế apoăng hơnăm ƀă mâu troăng hơlâ pêi pro túa pơkâ mơnhông mơdêk cheăng kâ rêh ối pơlê pơla, liăn ngân ki ‘no hrê tung 6 khế mơ’nui hơnăm 2021.

Tâ tá rôh hôp má 57 dêi Vi ƀan pơkuâ Kuô̆k hô̆i

Ăm rơkong veăng tơpui tối ‘na Kơxop hlá mơ-éa tơbleăng mơgêi rôh apoăng dêi rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hơnăm 2021 – 2026, kăn xiâm hnê ngăn Kuô̆k hô̆i mơnhên tối mâu tơdroăng ki veăng kum dêi mâu khu ki hbrâ mơdât pơreăng môi tiah khu ngăn pơkeăng, khu lêng, kŏng an, khu râ pơkuâ tíu pêi cheăng tung hnoăng cheăng tâ phĭu tơdroăng ki xúa kong ngê̆ thong tin tung rôh tâ phĭu; xuân môi tiah hnoăng cheăng tối tơbleăng tơdroăng kal ‘na tâ phĭu châ tơkŭm po tơdrăng, tơtro, hơniâp ro, veăng kum tung tơdroăng ki châ tơƀrê dêi rôh tâ phĭu.

Katarina Nga tơplôu ƀă tơbleăng