VOV4.Xơ Đăng - Kơxê lơ 6/1, a Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, kăn xiâm hnê ngăn tơnêi têa diâp Pơkâ to kơlŏng sap ing Trung tươ̆ng troh Thươ̆ng tươ̆ng ăm prế kăn phŏ ngăn Kŏng an cho pôa Trần Quốc Tỏ, prếi pôa Lương Tam Quang. Tơpui a rôh leh diâp Pơkâ, teăng mâ kăn pơkuâ Đảng, Tơnêi têa, rơkâu péa ngế kăn xiâm phŏ pơkuâ ngăn Kŏng an châ to kơlŏng sap ing Trung tươ̆ng troh Thươ̆ng tươ̆ng, pôa Nguyễn Xuân Phúc mơnhên tối, pôa Trần Quốc Tỏ prếi pôa Lương Tam Quang cho prế kăn ƀô̆ ai hiâm mơno tơdrăng, túa tơmiât tơtro, krá rơdêi, ai tơdroăng rêh ối lĕm; châ hnê mâu tơdroăng cheăng ki kal, chính quy, ki rơkê plĕng ƀă ivá cheăng rơkê; châ hnê hriâm pât, pơloăng mơnúa ƀă rơkê sap ing tơdroăng ki ai khât dêi tơdroăng cheăng, tơplâ; ai hên tơdroăng ki rơkê tung pơkuâ, rak ngăn mâu tíu pêi cheăng, kong pơlê.

Pôa Nguyễn Xuân Phúc, kăn xiâm hnê ngăn tơnêi têa loi tơngah ƀă rơhêng vâ prế ki kố pơtối mơ-eăm rơtế ƀă khu pú hên Đảng ủy Kŏng an Tơnêi têa, kăn pơkuâ Khu xiâm ngăn Kŏng an rak vế tơdroăng ki lĕm kăch măng, pơtối rak vế ƀă mơdêk tơdroăng ki lĕm ƀă um meá ngế lêng Kŏng an kuăn pơlê “xua tơnêi têa piu dêi tơná, xua tơdroăng cheăng kum kuăn pơlê” tung hneăng la ngiâ.

Katarina Nga tơplôu ƀă tơbleăng