VOV4.Xơ Đăng - Kơxo lơ 10/1, pôa Nguyễn Xuân Phúc, Kăn xiâm hnê ngăn tơnêi têa tơdah Đăi tươ̆ng Vilay Lakhamphong, Kăn cheăng tung Khu xiâm kal kí, Ngế xiâm pơkuâ Kŏng an kong têa Lếo dế lăm pôu pêi, pêi cheăng a Việt Nam. Teăng mâ khu râ kăn pơkuâ Đảng, Tơnêi têa Việt Nam, pôa Nguyễn Xuân Phúc, Kăn xiâm hnê ngăn tơnêi têa rơkâu pôa Vilay Lakhamphong châ rah xo cho Kăn cheăng tung Khu xiâm kal kí, tơdrêng amê cho Ngế xiâm pơkuâ Kŏng an apoăng châ to kơlŏng Đăi tươ̆ng Kŏng an kuăn pơlê dêi kong têa Lếo.

Pôa Nguyễn Xuân Phúc, Kăn xiâm hnê ngăn tơnêi têa tơdah Đăi tươ̆ng Vilay Lakhamphong, Ngế xiâm pơkuâ kŏng an kong têa Lếo

Kăn xiâm hnê ngăn tơnêi têa pói rơhêng vâ Khu xiâm pơkuâ Kŏng an péa tơnêi têa pơtối mơnhông khôi túa lĕm, thăm tơrŭm krá tơniăn, thăm trâu hơngế, rế tơleăng mâu tơdroăng ton xŏn, rế tơrŭm tung kơvâ ki nhên môi tiah tơplâ mơdât mâu ngế xôi troăng Internet, kŏng ngê̆; hbrâ mơdât mâu ngế xôi ‘na ma tŭi. Ngế xiâm pơkuâ Kŏng an kong têa Lếo mơnê tơdroăng tŏng kum kơnâ dêi Đảng, Tơnêi têa Việt Nam ƀă Khu xiâm pơkuâ Kŏng an Việt Nam đi đo rơtế kum kong têa Lếo, ki má lối cho mâu hneăng pá puât.

A Sa Ly tơplôu ƀă tơbleăng