VOV4.Sêdang - Kơxê lơ 15/7, a Tíu pêi cheăng Kăn xiâm, pôa Nguyễn Xuân Phúc, Kăn xiâm hnê ngăn tơnêi têa hiăng ai roh trâm mâ Kăn xiâm hnê ngăn Khu mơngế Hàn Quốc a Việt Nam ƀă mâu Grup pơkuâ cheăng ki kân Hàn Quốc. A roh trâm mâ, teăng mâ khu râ kăn pơkuâ Tơnêi têa, pôa Nguyễn Xuân Phúc phiu ro mâu khu tê mơdró Hàn Quốc a Việt Nam hiăng ôh tá ăm pơreăng COVID 19 xông tâ tú rơdâ tung mâu hngêi kơmăi, tíu tê mơdró; rak tơniăn pêi kâ ôh tá ăm tro pơtê tơdroăng cheăng. Ki rơhêng vâ tối mâu khu tê mơdró Hàn Quốc hiăng thăm tŏng kum hên rơtuh liăn ăm tơdroăng hbrâ mơdât COVID 19 ƀă veăng tơlo liăn rôe vaccine hbrâ mơdât COVID 19 a Việt Nam.

Pôa Nguyễn Xuân Phúc mơnhên, Việt Nam tơkêa pro tíu tê mơdró tơ’lêi hlâu ăm mâu khu tê mơdró mơnhông mơdêk, tung mê ai mâu khu tê mơdró kong têa Hàn Quốc vâ mâu khu mơ’no liăn cheăng đi đo mơ-eăm mơ’no liăn cheăng ôh tá xê to a kơpong châu Á mê mơ’no liăn cheăng tê mơdró tung lâp plâi tơnêi.

            A Sa Ly tơplôu ƀă tơbleăng