VOV4.Sêdang - Tiô rơkong krếo dêi jâ Jacinda Arden, Ngế pro xiâm hnê ngăn Chin phuh New Zealand, kơmăng lơ 16/7, pôa Nguyễn Xuân Phúc, Kăn xiâm hnê ngăn tơnêi têa hiăng veăng Roh hôp hbrâ hdrối mâu Khu râ kăn pơkuâ cheăng kâ Hneăng hôp tơpui tơno ‘na tơrŭm cheăng kâ Châu Á – Thái Bình Dương (APEC) ‘na hbrâ mơdât pơreăng COVID 19 ƀă mơnhông cheăng kâ. Ƀă dó inâi ‘’Hbrâ mơdât pơreăng kân COVID 19, alâi cho roh tơ’lêi hlâu dêi châu Á – Thái Bình Dương tơrŭm cheăng tơkâ hluâ ôh tá tơniăn khăm pơlât, thăm mơnhông cheăng kâ, pro xiâm rêi ăm tơdroăng la ngiâ tơtro lĕm tâ’’.Roh hôp tơkŭm tơpui tơno ‘na mâu troăng pêi tơkâ hluâ ôh tá tơniăn khăm pơlât ƀă thăm mơnhông cheăng kâ a kơpong châu Á – Thái Bình Dương.

Pôa Nguyễn Xuân Phúc, Kăn xiâm hnê ngăn tơnêi têa veăng hôp 'na cheăng kâ EPEC

Xông tơpui a roh hôp, pôa Nguyễn Xuân Phúc tối kố cho drêng mâu kong têa cheăng kâ kal thế tơkâ hluâ tơdroăng ki phá tơ-ê, rŭm môi tuăn rơtế dêi pó tơkâ luâ xahpá ƀă khŏm châ tơniăn tơdroăng rêh ối kuăn pơlê, djâ tơdroăng cheăng kâ lâp plâi tơnêi mơnhông tơtêk, tơmiât troh tơdroăng mơnhông mơdêk krá tơniăn, tŭm têk.

A Sa Ly tơplôu ƀă tơbleăng