VOV4.Sêdang - Drêng tơbâ 96 hơnăm hâi Hlá tơbeăng Kăch măng Việt Nam, kơxo lơ 15/6, pôa Nguyễn Trọng Nghĩa, kăn pơkuâ ngăn Tíu xiâm Đảng, kăn pơkuâ khu pơtâng tối tơdroăng kal Tơnêi têa hiăng troh pôu, rơkâu 4 to kơ koan chêh hlá tơbeăng ki xiâm, tung mê: ai Rơ’jiu xiâm Việt Nam, Um tơvi Việt Nam, hlá tơbeăng Nhân dân, Thŏng tâ̆n xah Việt Nam, tơdrêng amê hnối tối rơdêi kal pơtối mơjiâng hlá tơbeăng kăch măng, rơkê plĕng, tơdrăng ƀă tơƀrê.

Troh pôu, rơkâu Rơ’jiu xiâm Việt Nam, pôa Nguyễn Trọng Nghĩa mơnhên tối khât, tung pơla hdrối kố nah Rơ’jiu Việt Nam hiăng ai hên tơdroăng ki hơ’lêh nếo ‘na hnoăng cheăng tối tơbleăng tung rơ’jiu, tơdroăng ki xiâm, túa pơkâ ‘na tơdroăng kăch măng ƀă tơdroăng ki rơkê plĕng tiô chal nôkố, hên túa tung hnoăng cheăng tối tơbleăng, tung mê, pơkâ troh mâu kong pơlê, tíu tơkăng kong, chuăn rơlốu.

Pôa Nguyễn Trọng Nghĩa loi tơngah Rơ’jiu xiâm Việt Nam kô đi đo rế hía rế prôk trâu hngế, ƀă tối tơbleăng troăng pơkâ krá tơniăn ‘na troăng troăng hơlâ pơkâ dêi Đảng troh ƀă kuăn pơlê mâu hdroâng kuăn ngo, malối cho a kơpong tơkăng kong kô tối tơbleăng hên tâ nếo.

Katarina Nga tơplôu ƀă tơbleăng