VOV4.Sêdang - Vâ tơniăn ‘na on tơhrik mơ’no tung rôh po tơ’noăng mơgêi hriâm râ má pái phôh thong hơnăm 2021 hiăng vâ chê troh, Khu ngăn on tơhrik Dak Nông hiăng pơkâ troăng hơlâ hbrâ on tơhrik, vâ tơniăn ai on tơhrik mơ’no ăm mâu tíu tơ’noăng. Hneăng tơ’noăng mơgêi hriâm râ má pái phôh thong hơnăm 2021, kong pơlê Dak Nông ai 7.000 ngế hok tro chêh inâi tơ’noăng a 18 Hô̆i đong tơ’noăng. Vâ tơniăn ai on tơhrik mơ’no tung rôh tơ’noăng, kŏng ti ngăn on tơhrik Dak Nông ăm ‘nâi kô ôh tá tơpâ on tơhrik vâ ‘mâi rơnêu tiô pơkâ tung mâu hâi po tơ’noăng.

Khu ngăn on tơhrrik Dak Nông rak tơniăn ‘na mơ’no on tơhrik tung pơla tơ’noăng mơgêi hriâm râ má pái phôh thong hơnăm  2021

Pakĭng mê, kŏng ti hnê tối ăm khu ngăn on tơhrik pêi cheăng tơdrêng ƀă mâu hngêi trung ki tơkŭm po tơ’noăng ƀă mâu tíu pro Hô̆i đong ngăn ‘na tơ’noăng vâ tơrŭm ƀă séa ngăn kơtuh on tơhrik ki ju ivá, troăng kơxái on tơhrik dêi hngêi trung vâ rĕng châ ‘nâi tâng lơ ai tơdroăng xía vâ, hnê tối ăm hngêi trung pơ’lêh mâu tơmeăm ki mơ’no on tơhrik ki ôh tá krá lĕm xếo ki hiăng vâ tơ’nhiê.

Pakĭng mê, a mâu tíu tơ’noăng kơvâ ngăn on tơhrik kô ăm mâu ngế cheăng gak ngăn ƀă mâu khu ki lăm prôk ngăn a mâu tíu krâ ‘măn kơmăi ki kân, vâ teăm ‘mâi rơnêu drêng ai tơdroăng xía vâ, rĕng châ mơ’no on tơhrik nếo a mâu tíu tơ’noăng.  Pôa Lê Huy Thiệp, Kăn phŏ pơkuâ kŏng ti ngăn on tơhrik Dak Nông ăm ‘nâi:

“Kŏng ti hiăng mơjiâng troăng hơlâ nhên séa ngăn nếo mâu tíu tơ’noăng vâ tơniăn châ mơ’no on tơhrik tung pơla tơ’noăng. Kŏng ti hnê ăm mâu tíu pêi cheăng tơrŭm ƀă séa ngăn nếo mâu troăng kơxái on tơhrik, mâu tíu krâ ‘măn kơmăi ki kân vâ rĕng châ ’mâi rơnêu tâng lơ trâm tơdroăng xía vâ a mâu tíu tơ’noăng. 

Tíu pêi cheăng hiăng hbrâ kơmăi mơ’no on tơhrik ăm mâu tíu tơ’noăng vâ rak tơniăn ai on tơhrrik mơ’no hdrối tơ’noăng, tung pơla tơ’noăng ƀă klêi tơ’noăng”.

Gương tơplôu ƀă tơbleăng