VOV4.Sêdang - Kơxê lơ 25/6, pôa Nguyễn Phú Trọng, Kăn xiâm pơkuâ hnê ngăn Đảng hiăng pơkuâ roh hôp Khu xiâm kal kí vâ tơpui ‘na mâu troăng hơlâ tŏng kum mơngế pêi cheăng ƀă mơngế xúa mơngế pêi cheăng trâm pá puât xua tro tâ pơreăng kân COVID 19. Khu xiâm kal kí mơnhên, mâu roh pơreăng COVID 19 tung hơnăm nah ƀă hơnăm kố xông tâ tú ó, hiăng tơdjâk kân troh mâu tơdroăng pêi kâ, tê mơdró, ki rơhêng vâ tối cho a mâu kơpong hngêi kơmăi kơmok, kơpong mơjiâng pro kế tơmeăm khoăng.

Pôa Nguyễn Phú Trọng, Kăn xiâm pơkuâ hnê ngăn Đảng xông tơpui mơgêi roh hôp

Xông tơpui mơgêi roh hôp, pôa Nguyễn Phú Trọng tối ăm ‘nâi, Khu xiâm kal kí môi tuăn troăng hơlâ pơtối tơbleăng pêi pro troăng hơlâ tŏng kum ăm mơngế pêi cheăng ƀă mơngế xúa mơngế pêi cheăng trâm pá puât xua tơdjâk pơreăng kân COVID 19. Tối nhên, xo vế túa ki rơkê tơtro ing tơdroăng pêi pro Pơkâ 42 dêi Chin phuh ƀă pơtối hriâm túa ki rơkê, troăng tŏng kum dêi mâu kong têa lâp plâi tơnêi vâ tơkŭm séa ngăn, mơnhên tro mơngế kal tŏng kum i nhên, mơjiâng kơlo tŏng kum tơtro, tơniăn krá, tơdâng tơ’mô, tơbleăng tơdrăng lĕm, châ tơƀrê. Pôa Nguyễn Phú Trọng tối pơchân, pơreăng xông tâ tú ối râ ó, xua mê, ôh tá chiâng tơngôu tung tơdroăng hbrâ mơdât pơreăng.

A Sa Ly tơplôu  ƀă tơbleăng