VOV4.Sêdang - Kơxêi măng lơ 12/7, a Hà Nội, Đăi tươ̆ng Tô Lâm, Ngế xiâm pơkuâ Kŏng an hiăng tơpui tơno mơ’no tơdrêng tung um tơvi ƀă pôa Ajit Kumar Doval, Ngế kum cheăng tơpui kâ kring tơniăn kong têa Ấn Độ. A rôh tơpui péa pâ púi vâ pơtối mơdêk tơrŭm tối ăm dêi rơpó ‘nâi mâu tơdroăng, hnê tối mâu tơdroăng pêi pro dêi Kăn xiâm, tơrŭm veăng kum dêi rơpó a mâu hneăng hôp lâp plâi tơnêi xuân môi tiah tung tơleăng mơnhên mâu tơdroăng ki péa pâ kal vâ ‘nâi plĕng.

Tối tơbleăng a hneăng hôp, Ngế kum cheăng tơpui kâ kring tơniăn kong têa Ấn Độ đi đo nhoăm ƀă pơtối rak vế, mơnhông tơrŭm tung tŭm tơdroăng cheăng tiah hmâ sap nah ki kal dêi péa tơnêi têa, vâ mơdêk, po rơdâ tơrŭm cheăng ƀă Khu xiâm kŏng an Việt Nam tung tâi tâng mâu tơdroăng.

Péa pâ pơtối tơkŭm po tơ-ƀrê tơpui kâ Kring tơniăn râ Ngế xiâm phŏ pơla péa pâ roh má péa a Ấn Độ; Mơdêk tơrŭm hbrâ mơdât khu lêng ‘mêi, khu ki ai xôi kân tơkâ luâ kong têa, khu ai xôi ki xúa kơmăi kơmăi kơmok ki dâi lĕm, khu ki kâ liăn ôh tá tơdrăng, mâu ai xôi ‘na ma tŭi; mơdêk tơrŭm cheăng hnê hriâm, hnê mâu kăn ƀô̆ kơvâ cheăng ‘na kŏng nghĕ thŏng tin, ‘na khoa hok dêi luât.

Gương tơplôu ƀă tơbleăng