VOV4.Sêdang - Kơxo kố, lơ 22/6, a Hà Nội, Khu xiâm ngăn Kŏng an tơkŭm po Rôh hôp ‘no tơdrêng ing um tơvi Mơgêi mơjiâng, tơbleăng tơdroăng tơkêa Tíu ki ‘măn rak inâi mơéa tơnêi têa ‘na kuăn pơlê, Tơdroăng tơkêa ki pro, hbru, rak ngăn Căn cước công dân ƀă tơdroăng tơbleăng tơdroăng ki xúa sap ing hâi lơ 1/7/2021. Tơdroăng ki mơjiâng pro tíu ‘măn rak inâi hlá mơéa ‘na tíu ối cho môi tung mâu hnoăng cheăng ki kal, pro chiâng tơdroăng ki kal ăm hnoăng cheăng rak ngăn ‘na hlá mơéa tơnêi têa tiô troăng chal nếo nôkố, xúa kong nghê̆ thong tin tung pơkâ tơleăng hlá mơéa ăm kuăn pơlê, kơdroh chôu phut ƀă kơxô̆ liăn nâp ăm tơdroăng ki pơkâ tơleăng hlá mơéa, mơdêk ki tơƀrê rak ngăn tơnêi têa ƀă veăng kum mơnhông Chin phuh điê̆n tưh. Ƀă mâu tơdroăng ki hiăng pêi pro klêi, Khu xiâm ngăn Kŏng an pơxiâm tơbleăng pêi klêi tơdroăng pơkâ mơjiâng pro Tíu ‘măn rak inâi hlá mơéa tơnêi têa ‘na tíu kuăn pơlê rêh ối ƀă tơdroăng tơkêa pro, hbru ƀă rak ngăn căn cước công dân. Péa tơdroăng kố kô châ pơxiâm pêi cheăng sap ing hâi lơ 1/7/2021 ƀă hbrâ rơnáu tơdjêp ƀă mâu khu xiâm, kơvâ cheăng, kong pơlê kum mơjiâng Chin phuh điê̆n tưh ƀă kum kuăn pơlê.

Katarina Nga tơplôu ƀă tơbleăng