VOV4.Sêdang - Khu xiâm pơkuâ hnê hriâm ƀă hnê mơjiâng tuăn ngôa rơkê ‘na tơdroăng thăm hnê hriâm ing Internet, tung um tơvi tung pơla pơtê hriâm vâ hbrâ mơdât pơreăng COVID 19. Hlá mơ-éa dêi Khu xiâm pơkuâ hnê hriâm ƀă Hnê mơjiâng tuăn ngôa rơkê tối nhên, drêng pơreăng COVID 19 xông tâ tú ó, tung pơla hok tro phôh thong, hok tro hngêi trung hnê đi đo pơtê pơtân hriâm, Khu xiâm pơkuâ hnê hriâm ƀă Hnê mơjiâng tuăn ngôa rơkê pơkâ mâu Khu pơkuâ Hnê hriâm ƀă Hnê mơjiâng tuăn ngôa rơkê pơtối pêi pro mâu troăng hnê hriâm ing Internet, um tơvi.

Ki nhên, mâu Khu pơkuâ hnê hriâm ƀă Hnê mơjiâng tuăn ngôa rơkê hnê mơhno mâu hngêi trung séa ngăn, kơdroh tơdroăng hnê hriâm vâ tơkŭm po hnê hriâm ing internet, tung um tơvi, hnê ăm tơtro. Tung tơdroăng pêi pro, kal séa ngăn, xúa mâu tơdroăng hnê ki loi tơngah, tơtro vâ tơkŭm po hnê hriâm ƀă hnê mơhno hok tro hriâm tâp. Drêng hok tro vêh hriâm, mâu hngêi trung kô tơkŭm po séa ngăn, mơnhên tơdroăng hnê hriâm dêi hok tro ing internet, tung um tơvi.

A Sa Ly tơplôu ƀă tơbleăng