VOV4.Sêdang - Kơxo lơ 21/6, Đảng uỷ Kŏng an xiâm Tơnêi têa, Khu xiâm pơkuâ Kŏng an tơkŭm po Hneăng hôp mơgêi pơtân tơdroăng pêi cheăng Kŏng an 6 khế apoăng hơnăm 2021. Tơbleăng a hneăng hôp tối nhên: sap apoăng hơnăm troh nôkố, khu Kŏng an kuăn pơlê hiăng mơ-eăm, tơkŭm pêi pro kơtăng mâu tơdroăng pêi, pơkâ pêi, troăng pêi cheăng hiăng pơkâ mơ’no vâ pêi pro ƀlêi trâng pơkâ xiâm, pơkâ pêi dêi hơnăm 2021.

Pôa Nguyễn Xuân Phúc, kăn xiâm hnê ngăn tơnêi têa veăng hôp a hneăng hôp mơgê ihnoăng cheăng Kŏng an 6 khế apoăng hơnăm

Xông tơpui a hneăng hôp, pôa Nguyễn Xuân Phúc, Kăn xiâm hnê ngăn tơnêi têa tối nhên: ‘’Drêng ai pơreăng xông tâ tú ó, tơdroăng ki mâu ngế ‘mêi tăng troăng ‘nhê tơnêi têa kơtăng, Khu xiâm pơkuâ Kŏng an hiăng mơ-eăm hên, rơtế khu Mô đô̆i, mâu khu râ kăn pơkuâ cheăng Đảng, Măt trâ̆n Tơnêi têa ƀă hía hé vâ tơkŭm mơhnhôk khu cheăng, pêi pro mâu troăng gak kring tơniăn mâu tơdroăng kal kân dêi tơnêi têa.

Ki má lối môi tiah Hneăng hôp Đảng roh má XIII, rah xo Kăn Kuô̆k hô̆i, tâ phĭu rah xo Hô̆i đong kuăn pơlê mâu râ ƀă hiá hé, kêi đeăng châ tơƀrê mâu pơkâ, hnoăng cheăng pơkâ mơ’no’’.

A Sa Ly tơplôu ƀă tơbleăng