VOV4.Sêdang - Hdroâng kuăn ngo Rơđế lơ M’nông a kong pơlê Dak Nông pôh hơmâng rơtế ƀă mâu kơchâi hĕm hŏm ki ê ki hnêi xo ing kong thăm pro hơmâng rế kơhiâm, tơtro ƀă krôk kâ dêi kuăn mơngế.

Mâu hơmâng mê châ rup xo ing têa kroăng, têa plông châ pro krúa, lế tah lôi klêa xăng. Vâi xếo klêa i krúa lĕm ƀă po lơ môi kơtuô pló ki tơvât tâi tâng tung hơmâng vâ tah lôi têa ki kơƀêl drăng kéa hơmâng. Vâ ôh tá tro xú khêi, kal athế xếo krúa mơheăm hơmâng a klêa ƀă 2 pâ meăng dêi hơmâng. Vâi ối xúa hơkê chiê drô kéa, klêa hơmâng vâ tơvât ƀă mâu kế ki xú hŏm, kơchâi nhâ kong vâ hơmâng rĕng chên tơ’mô ƀă hơ’neh tung dế rĕng pruăn. Klêi kơ’nâi pro ti mê, vâi lôi hơmâng ăm i xĭng têa, klêi mê, nếo tâm ƀă mâu tơmeăm ki tơvât ƀă hơmâng.

Hơmâng pôh hơkĕm kâ ƀă kơchâi kong

Hơmâng vâi pôh tiô túa ki tơtro dêi mơngế hdroâng kuăn ngo tung kong pơlê, mê cho tơdroăng ki tơrŭm pêi pro tơtrro khât pơla hơmâng ƀă mâu kơchâi nhâ, kế hĕm hŏm. Mê cho hlá kloăng, plăng, hlá plâi hmŏn bă hên mâu tơmeăm ki ê. Vâi tâ ‘măn tung póu, tơvât môi iâ po, ƀot ngot, hăng, kơtĕm xâk rơtế ƀă hlá kloăng, hlá loăng hmŏn, plăng hiăng chiê rơtăng. Drêng tơvât mê, vâi ối tâ tơmeăm hăng po tung klêa hơmâng ƀă mâu tíu ki vâi hiăng chiê drô kéa hơmâng. Tơkôm ton châ dâng 15 phut vâi tơvât ƀă mâu po hăng ăm i tơ’mô, vâi ối xúa kơlá ki kŭn vâi pâk xúa hơmâng ing ko troh a tĭng.

Chiê môi iâ mâu troăng a châ hơmâng vâ tơvât mâu kơchâi nhâ xú hŏm drêng pôh ga kô kơhiâm tâ

Pộh hơmâng a khâng on ki hiăng pro hlâu. Tung pơla pôh hơmâng, vâi kôm ăm hơmâng chên tơ’mô, tung pơla pôh mê ton dâng 30 phut ƀă ngăn tiô kơ rêm túa hơmâng kân lơ kŭn. Drêng hlo hơmâng pơxiâm xú hŏm, mâu tơmeăm ki tơvât mê hiăng trĭng ƀă klêi mê, hơmâng ôh tá lo têa xếo, tơkéa vâ tối hơmâng hiăng chên.

Hơ’neh hơmâng hiăng chên ƀă hiăng tơpruăn, drêng mê xú tâ kơhiâm lĕm. Hơmâng ki pôh kô chiâng kâ ƀă mâu kơchâi kong ki chiâng xêh, môi tiah hlá hluâ, hlá plâi hrá, hlá đinh lăng, hlá plâi hmŏn kơbâng, hlá plâi nong kơbâng... Mâu hlá ki kố cho kơchâi kong xuân cho pơkeăng ki lĕm ăm ivá châ chăn ƀă kuăn pơlê akố; piê xo môi iâ hơ’neh hơmâng ki pôh mê, lŭm ƀă hlá kơchâi nhâ kong xuân chiâng vâ hơ-iu po hăng plăng kơtĕm kâ ga kơhiâm ó khât, ôh tá ai kế ki lâi ki kơhiâm tơ’mô.

Hơ’neh hơmâng pôh ga rơpâ, ôh tá xĭng, ki kơhiâm, hơ-iâ dêi hơmâng thăm rế pro xú lĕm ăm mơngế ki kâ, kâ ôh tá la lâi kâi ni.

Hlá tơbeăng Dak Nông

Nhat Lisa tơplôu ƀă tơbleăng