VOV4.Sêdang - Drêng Pơlê kong kân Hồ Chí Minh ôh tá bê kơchâi drêh tung mâu hâi apoăng hbrâ, tơplâ, mơdât pơreăng COVID-19, hên Kâu lăk ƀô̆, Khu, mu, mâu tung pơlê pơla rơtế ƀă lôí hrĭng ngế a kong pơlê Kon Tum hiăng tơkŭm rôe kơchâi drêh vâ pơto djâ chiân troh a pơlê kong kân.

Sap ing kơxo má, nâ Nguyễn Thị Thảo Nguyên, Kăn pơkuâ Kâu lăk ƀô̆ pleăng mơheăm kơpong Kon Tum ƀă Tây Nguyên hiăng ai mâ a môi kơdrum kơchâi drêh a bêng Nguyễn Trãi, pơlê kong kơdrâm Kon Tum. Nâ Nguyên tối ăm ‘nâi ing măng pơlê pơla, ‘nâi tơdroăng pêi pơxúa dêi Kâu lăk ƀô̆, ngế pơkuâ kơdrum kơchâi drêh ti tăng troăng tơpui tŏng kum Kâu lăk ƀô̆ 2 kơ’noăng pêt kơchâi hơpê krúa lĕm.

Tơdroăng pêi ki ê dêi mâu khu tung Kâu lăk ƀô̆ cho krê, pui kơchâi pơtroh a tíu ‘măn tơkŭm ƀă rak ‘măn vâ kơchâi drêh kơhiâm:

‘’Kơchâi drêh tro drêng rơnó lâk xo, tơniăn kơchâi drêh, krúa lĕm. Tâng pơto troh a mê hŏn, ŭm mê mơngế amê ôh tá chiâng vâ xúa cho mơ’nhê tê kơtê. Ngin ai tơrŭm ƀă mâu Kâu lăk ƀô̆ a mâu tơring vâ pro tíu tơdah tơmeăm tŏng kum dêi rêm ngế. Kơ’nâi mê ngin kô ‘măn môi tíu a pơlê kong kơdrâm Kon Tum ƀă kơ’nâi mê pơto tung rơxế djâ a pơlê kong kân’’.

Khu ngế Kâu lăk ƀô̆ pleăng mơheăm kơpong Kon Tum ƀă Tây Nguyên kêi, pui xo kơchâi drêh

Tơrŭm pêi pro tơdroăng tŏng kum kơchâi drêh kum kuăn pơlê Pơlê kong kân Hồ Chí Minh, mâu Kâu lăk ƀô̆, Đô̆i, Khu ki pleăng hnoăng cheăng xua pơlê pơla a Kon Tum hiăng tăng châ dâng 10 tâ̆n kơchâi drêh pơtroh chiân kuăn pơlê a pơlê kong kân. Pakĭng mê, mâu kơchâi drêh xúa pế kâ tơdrêng hlối, môi tiah kơchâi hơpê, kơchâi têa mâk, kơchâi ƀôt ngót ƀă hía hé, ƀă mâu pốu, plôi, prá kô chiâng xúa ton hâi.

Ki kơnía má môi, nhuô̆m khât tơdroăng tŏng kum kơchâi drêh kum kuăn pơlê Pơlê kong kân Hồ Chí Minh châ hên ngế kuăn pơlê a kong pơlê Kon Tum môi tuăn pêi pro. Nâ Bùi Thị Tuyết Yên, hngêi a tôh 2, bêng Nguyễn Trãi, pơlê kong kơdrâm Kon Tum, ai kơdrum kơchâi ƀôt ngot tê rêm hâi pơkâ tŏng kum tâi tâng kơdrum kơchâi drêh dêi rơpŏng, tối ăm ‘nâi:

‘’Hngêi pêt to kơchâi ƀôt ngot, kâi pôe to lâi mê pôe to mê á vâ tŏng kum kuăn pơlê a pơlê kong kân. Drêng ai rơxế tiah kố vâi o prôk mê á ai kơchâi mê tŏng kum ăm mâu ngế kuăn pơlê tung mê. Môi iâ drêng kơklêa ƀă môi kơxuô drêng phâi’’.

Rơtế ƀă tơkŭm tăng kơchâi drêh ing hên tíu a pơlê kong kơdrâm Kon Tum ƀă mâu tơring, môi tiah: Đăk Hà, Đăk Tô, Kon Plông ƀă hía hé, mâu khu tung Kâu lăk ƀô̆ pleăng mơheăm kơpong Kon Tum ƀă Tây Nguyên. Á hâk pâ Kon Tum, Khu ngế a Kon Tum ƀă hía hé kô tơkŭm rah khu kơchâi, rak ngăn vâ pơto kơchâi drêh mot a Pơlê kong kân Hồ Chí Minh.

Ngoh Trần Văn Cao Sang, Kăn pơkuâ Kâu lăk ƀô̆ Á hâk pâ Kon Tum tối ăm ‘nâi, troăng pơto ƀă xing xoăng kơchâi drêh tung pơla pơreăng COVID 19 xuân hiăng tơmiât nhên tơniăn kơchâi drêh troh a kŏng kuăn pơlê kong kân rĕng má môi ƀă tơniăn má môi:

‘’Apoăng cho tơdroăng mung rơxế kân pơto. Mung rơxế mê pơkâ thế khăm ngăn COVID 19. Á tơpui châ ƀă Kâu lăk ƀô̆ Đô̆i, Khu a Gia Lai vâi ai rơxế pơto ôh tá xo liăn. Á pơto troh amê tơdjuôm ƀă vâi. Ƀă tíu ki vâ xing xoăng mê á ai tơpui ƀă khu pơkuâ Đoân droh rơtăm Pơlê kong kân Hồ Chí Minh ƀă mâu Kâu lăk ƀô̆ Đô̆i, Khu tung mê. Vâi hbrâ tơdah tơmeăm pin vâ vâi djâ troh kơpong klâ kơtăn ƀă mâu kơpong dế kâng kơxái ôh tá ăm kuăn pơlê lo pa gong’’.

Khoa Điềm chêh

A Sa Ly tơplôu ƀă tơbleăng