VOV4.Sêdang - Pơxiâm sap apoăng hâi lơ 15/7, kong pơlê Kon Tum pêi pro tơdroăng kum liăn pêi cheăng ăm Tôh pêi cheăng ‘na hbrâ mơdât pơreăng COVID-19. Ing mê, Vi ƀan kong pơlê Kon Tum pêi pro tơdroăng tŏng kum liăn pêi cheăng ăm Tôh pêi cheăng hbrâ mơdât pơreăng COVID-19 ƀă kơlo 80.000 liăn/ngế/hâi. Kơxô̆ mơngế châ kum dêi môi tôh ôh tá luâ 1 ngế/hâi.

Kuăn pơlê lăm chêh tối ƀă khăm ngăn dêi ivá châ chăn hdrối vâ mot a Kon Tum

Vâ ai kơxô̆ liăn pêi pro, Vi ƀan kong pơlê Kon Tum pơkâ thế Tíu xiâm veăng kum 70%, ki u ối 30% xua liăn ngân kong pơlê pro ‘no. Nôkố kong pơlê Kon Tum ai 2 rơpâu 832 Tôh pêi cheăng hbrâ mơdât pơreăng COVID-19. Tiah mê, ƀă kơlo tŏng kum 80 rơpâu liăn ăm môi ngế dêi môi tôh, môi hâi tâi tâng kơxô̆ liăn mê ki kong pơlê Kon Tum thế ‘no ai lối 220 rơtuh liăn. Kon Tum cho môi tung iâ kong pơlê dêi lâp tơnêi têa troh nôkố hâi ai ngế ki yương tĭnh ƀă SARS-CoV-2,  la xuân kô tơ’lêi tâ pơreăng hên tâ.

Gương tơplôu ƀă tơbleăng