VOV4.Sêdang - Ôh tá xê to kơtâu hdâ hmuâ ôh tá vâ khăm ngăn COVID 19, mê Phan Trọng Hậu ối xiăn 2 ngế Kán sat gak troăng prôk ƀă rơxế kơtâu drêng tro kan sat ti dât. Tơdroăng kố a tiú gak khăm ngăn COVID 19 kơxô̆ 2 dêi kong pơlê Kon Tum pro a Tíu pơtê chêng văng Lò Xo – troăng Hồ Chí Minh (km kơxô̆ 1414 + 600), kơpong xí Đăk Chè, ối a thôn Măng Khênh, cheăm Đăk Man, tơring Đăk Glei.

Phan Trọng Hậu hiăng tro rup

Phan Trọng Hậu, 29 hơnăm, ối a kong pơlê Tây Ninh dế to rơxế troăng kân Hồ Chí Minh ƀă rơxế honđa krâ kơxô̆ 60B4 – 46481 tiô troăng ing tơring Phước Sơn, kong pơlê Quảng Nam vêh a tơring Đăk Glei, kong pơlê Kon Tum. Klêi kơ’nâi xiăn 2 ngế kan sat gak troăng prôk ƀă rơxế kơtâu, Hậu tro 2 ngế kan sát rơtế ƀă Kŏng an cheăm Đăk Man rup. Nôkố Kŏng an tơring Đăk Glei, kong pơlê Kon Tum dế xo rơkong tơpui tối vâ séa ngăn nhên roh tơdroăng kố.

A Sa Ly tơplôu ƀă tơbleăng