VOV4.Sêdang - Kơxo lơ 14/7, a ilâng kiâ mô đô̆i kong pơlê Kon Tum, khu pơkuâ ngăn pơlê kong kơdrâm, Hô̆i đong hnê ngăn, Vi ƀan hnê ngăn, Vi ƀan Măt trâ̆n tơnêi têa Việt Nam pơlê kong kơdrâm Kon Tum tơkŭm po leh pôu ngăn, tơbâ vế ƀă ‘mế 2 kơxêng kiâ mô đô̆i hlâ tung rôh tơplâ nếo châ hlo a pơlê kong kơdrâm. Péa to kơxêng kiâ mô đô̆i kố châ Khu pơkuâ ngăn lêng pơlê kong kơdrâm Kon Tum tơrŭm ƀă Khu pơkuâ ngăn lêng cheăm Ngọc Bay ƀă Kroong tơkŭm tung mâu hâi apoăng khế 7 sap ing tơdroăng ki tối tơbleăng dêi kuăn pơlê a pơlê kong kơdrâm.

Leh pôu ngăn, tơbâ vế ƀă ‘mế 2 to kơxêng kiâ mô đô̆i

Tiô tơdroăng ăm ‘nâi sap ing Khu pơkuâ ngăn lêng pơlê kong kơdrâm Kon Tum, péa to kơxêng kiâ mố đô̆i châ tăng hlo tung klôh tơplâ. Kế tơmeăm ki u ối cho hmân ếo mô đô̆i ƀă pơché mô đô̆i nôkố pơrá tá hâi mơnhên inâi. Tung rôh tơplâ xâ Mih tŏng xo tơnêi têa a pơlê kong kơdrâm Kon Tum, kong pơlê Kon Tum cho tíu tơplâ ki ó.

Lối 46 hơnăm klêi kơ’nâi tơleăng lĕm peăng Hdroh pro tơnêi têa tơrŭm chiâng môi, Đảng ƀô̆, khu pơkuâ, khu ki ai tơdjâk troh ƀă kuăn pơlê pơlê kong kơdrâm Kon Tum xuân dế pơtối tí tăng, tơkŭm kơxêng kiâ mố đô̆i u ối a tíu tơplâ.

Katarina Nga tơplôu ƀă tơbleăng