VOV4.Xơ Đăng - Hâi lơ 7/1, Kŏng an kong pơlê Dak Nông hiăng tơkŭm po Rôh hôp mơgêi hnoăng cheăng hơnăm 2021 ƀă tơbleăng hnoăng cheăng hơnăm 2022. Tối tơbleăng a rôh hôp ai tối nhên, hơnăm hdrối nah, khu Kŏng an Dak Nông hiăng tơrŭm, mơ-eăm tơkâ luâ xơpá, hbrâ rơnáu ‘nâi nhên tơdroăng, tơbleăng pêi pro tro hnoăng cheăng, troăng hơlâ hnoăng cheăng kŏng an tung tơdroăng ki hmâ tơniăn, rơkê, kâi hbrâ mơdât pơreăng COVID-19.

Kŏng an Dak Nông 4 hơnăm hlối châ Khu xiâm ngăn Kŏng an diâp hlá cơ tơ’noăng rơkê 

Ƀă mâu tơdroăng ki mê, hnoăng cheăng rơkê, hơnăm 2021, khu Kŏng an Dak Nông hiăng châ Kăn hnê ngăn tơnêi têa diâp Mê dái pêi hnoăng cheăng ối má péa ăm môi khu pú hên, Mê dái tơplâ ối má pái ăm môi ngế krê, Mê dái rak vế Tơnêi têa ối má péa, ối má pái ăm 11 ngế krê. Malối kố cho hơnăm má 3 Kŏng an kong pơlê Dak Nông hâk tơngăm châ Ngế pro xiâm hnê ngăn Chin phuh diâp Ƀâng khê̆n kơdeăn; hơnăm má 4 pơtối hlối châ Khu xiâm ngăn Kŏng an diâp hlá cơ tơ’noăng rơkê “Tíu pêi cheăng ki djâ troăng ahdrói tung tơ’noăng Xua tơdroăng gak kring Tơnêi têa”.

Katarina Nga tơplôu ƀă tơbleăng