VOV4.Sêdang - Kong mêi ton tung mâu hâi hdrối kố nah hiăng pro kơpong a kong pơlê Lâm Đồng tro têa lu. A cheăm Hiệp An, tơring Đức Trọng, kong mêi ton, kơdró têa sap ing peăng kơnhŏng hiu troh pro mâu thôn Định An, K’Rèn, K’Long ƀă Tân An tro têa lu. Xua kơdró têa tâk đik sap ing 1 troh 1,5 met mê hên ƀăng tơnêi pêi pêt kơchâi prá alâi dêi kuăn pơlê tung kơpong tro têa lu trâu. Ôh ti xê to a cheăm Hiệp An, kong mêi ton tung lâp lu xuân pro kơdró têa kroăng Cam Ly tâk đik ƀă lu ó a cheăm Hiệp Thạnh, tơring Đức Trọng ƀă a mâu tíu ki ê a tơring Lâm Hà.

Kong mê kân, têa ing peăng kơnhŏng hiu troh pro cheăm Hiệp An, tơring Đức Trọng tro têa lu

Hlo ôh tá tơniăn dêi kong prâi, Ƀơrô cheăng hnê mơhno Tơnêi têa ‘na hbrâ ví kong mêi khía mơhot têa kân lân lu hiăng ai hlá mơ-éa pơtroh ăm Khu pơkuâ tơdroăng hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ kong pơlê Lâm Đồng ‘na tơdroăng ki hbrâ ví ƀă têa kân lân lu kơpong kroăng Cam Ly; tơbleăng túa pơkâ ki ‘mâi xĕn kuăn pơlê lo ing mâu kơpong ki rơ-iêo troh tíu tơniăn.

Katarina Nga tơplôu ƀă tơbleăng