VOV4.Sêdang - Chin phuh nếo pơkâ tơdroăng 68 ‘na mâu troăng hơlâ tŏng kum mâu ngế pêi cheăng ƀă ngế ki xúa mâu ngế pêi cheăng dế trâm pá xua pơreăng kân COVID-19 ƀă ki kơnâ 26 rơpâu rơtal. Tung pơla pơreăng tâ tú rế hía rế ôh tá tơniăn, kơxô̆ liăn tŏng kum kố châ pơkâ hên tơdroăng ki loi tơngah kô kum khu mơdró kâ, mâu ngế pêi cheăng tơkâ luâ xơpá.

Laga, hên ngế dế tơmiât hên, ƀă tơdroăng ki tơ’lêi hlâu tâ, tơ’lêi châ mung xo kơxô̆ liăn, mê kơxô̆ liăn tŏng kum kố hôm châ ăm mung môi tiah tơdroăng ki loi tơngah?

-Ô pôa, nếo achê kố, Chin phuh nếo tơbleăng tơdroăng Pơkâ 68 ‘na mâu luât tŏng kum mâu ngế pêi cheăng ƀă xúa mơngế pêi cheăng trâm pá xua pơreăng kân COVID-19 ƀă kơnâ châ 26 rơpâu rơtal liăn, ai 12 tơdroăng kal ƀă khu ngế châ xuá luât pơkâ tŏng kum. Pôa hlo ti lâi ‘na kơxô̆ liăn ki tŏng kum mê?

Pôa Phạm Quang Tú: Ki hdrối, Khu tơrŭm cheăng Oxfam hâk mơnê Việt Nam  pơtối châ xo kơxô̆ liăn tŏng kum roh má 2 ƀă mâu ngế  cho mâu ngế pêi cheăng ƀă khu mơdró ki tro tơdjâk xua pơreăng kân COVID-19. Tơdroăng kố mơhno ing luât pơkâ tŏng kum ki rơkê tơtro dêi Chin phuh Việt Nam pơtối tŏng kum mâu ngế ki tro tơdjâk xua pơreăng kân tâ tú ƀă tiô tơdroăng hiăng tối tơbleăng “Ôh tá lôi ngế ki lâi pá rŏng”.

Ngin xuân khĕn kơdeăn khât mâu ngế ki châ  xuá tơdroăng tŏng kum rôh kố châ po rơdâ ƀă malối mơnê Chin phuh hiăng ăm khu ngế pêi cheăng tơ’lêi hlâu mot tung Pơkâ mơhé tiô hlá mơ-eá tơbleăng ai chêh pơtroh apoăng dêi khu xiâm ngăn cheăng pêi - Mô đô̆i trong ƀă pơlê pơla, mâu ki mê ôh tá xê mâu ngế ki châ chêh ‘mot tiô tơdroăng chêh tối hdrối.

Kố cho mâu ngế ki séa ngăn ƀă tí tăng ngăn dêi ngin, kố cho mâu ngế ki tro tơdjâk ƀă ôh tá mơhúa xêh ki pá xêh tung hên tơdroăng. 

Xua mê, tơdroăng Chin phuh hiăng chêh ‘mot mâu khu ki kố tung inâi châ xúa cho Pơkâ nhên khât ƀă tơxâng hâk mơnê”.

-Tiah mê tiô pôa, tơdroăng pơkâ mơnhên mâu ngế kal châ tŏng kum roh má péa kal thế pêi pro môi tiah lâi vâ tâi tâng mâu ngế ki mê châ tŭm tơdroăng pơkâ vâ châ tŏng kum, tơ’lêi hlâu má môi ai môi tiah tơdroăng Pơkâ nếo tối?

Pôa Phạm Quang Tú: Pơkâ 68 hiăng tối nhên mâu ngế ki lâi, laga ối ai mâu ngế ki ế nếo tơxâng châ tŏng kum tiô ngin hâi chêh tối tâi mâu tơdroăng tung Pơkâ mê. Môi tiah kuăn pơlê ki pêi chiâk tro tơdjâk xua pơreăng COVID, xua trâm pá tung tơdroăng ôh tá ăm prôk lo pá gong tung mâu kơpong tâ pơreăng, tơmeăm pêi lo dêi vâi ôh tá châ tê ‘na tê vâi rôe ƀă yă rơpâ tâ yă vâi pêi lo, mê xuân cho mâu ngế kal châ tŏng kum.

Laga, tiô pơkâ dêi tơdroăng Pơkâ 68, troh nôkố mâu ngế hiăng châ mơnhên ƀă vâ tối ki tro gá pro ti lâi vâ ngin ‘nâi nhên tro mâu ngế tung tơdroăng pơkâ mê. A tơmiât tiah kố mâu khu mơdró tro tơdjâk, mơngế pêi cheăng ai kĭ hợp đong pêi cheăng tro pơtê ôh tá ai cheăng pêi lơ tro pơtê iâ pơla ôh tá ai cheăng pêi mê a tơmiât tơ’lêi vâ pơkâ.

Xua mê, cho khu ki ai chêh pro hlá mơ-eá môi tiah khu mơdró ai chêh inâi mơdró kâm, ai ivá mơnhên ki lŭp dêi vâi. Laga, ki kal má môi cho mơngế pêi cheăng pá kong mê ăm hlo nhên kal thế pơ’lêh tung séa ngăn tơdroăng xuân môi tiah tung pơla mơnhên khu mơngế ki mê.

Xua cho ƀai hriâm túa cheăng dêi tơdroăng tŏng kum rôh má môi, mê ai hên ngế pêi cheăng ki pêi cheăng pá kong, pêi cheăng ôh tá ai pơkâ khế hơnăm la ai tŭm tơdroăng pơkâ vâ châ xúa kơxô̆ liăn tŏng kum, laga xua pro hlá mơ-eá, kĭ tâk tăm pŏng ‘na tơdroăng tơná, mơngế ki tơxâng châ xúa tơdroăng tŏng kum mê la ôh tá châ  tŏng kum.

Pôa Phạm Quang Tú

Tiô pơkâ a tơdroăng Pơkâ 68, mơngế pêi cheăng pá kong kô xua rêm kong pơlê pơkâ ngăn tiô kơ liăn ngân kong pơlê ƀă kơlo tŏng kum ôh tá iâ tâ luâ 1 rơtuh liăn/môi ngế. Tơdroăng mê hôm tơxâng há, ô pôa?

Pôa Phạm Quang Tú: ’Na kơxô̆ liăn tŏng kum, a hlo iâ ‘nâng. Ki khât gá, tung rôh tŏng kum má môi, kơxô̆ hên tâ, mơni 1 rơtuh pơtăm hrĭng rơpâu liăn la xua pro hlá mơ-eá pá puât, tơ’nôm ƀă kơxô̆ liăn tŏng kum mê ôh tá hên xua mê ai hên ngế pêi cheăng vâi ôh tá nâp hồ sơ xua kơxô̆ liăn ki mê ôh tá bê tơxâng lơ ôh tá bê hên vâ tŏng kum ăm rơpŏng hngêi vâi tâng vâ pơchông ƀă kơxô̆ liăn hrê tung pơla prôk pro hồ sơ, pro hlá mơ-eá lối hên mê vâi chiâng tơmiât ôh tá hêng nâp hồ sơ xếo.

Mê cho tơdroăng vâ tối to kơxô̆ liăn tŏng kum roh má môi ƀă mơngế pêi cheăng ki lăm ukố umê, kơxô̆ liăn tŏng kum ƀă liăn ăm mê iâ ‘nâng. Tâng bú kal ai tơdjâk la châ tŏng kum mê kô tơ’lêi tâ ƀă hlâu tâ há. Tiah mê, mâu kăn kong pơlê ƀă mâu kơ koan cheăng ‘na kơvâ ki mê thế pôu râng hnoăng cheăng mê xuân khên tơnôu tâ há tung tơdroăng pêi pro hlá mơ-éa. Xua tung pơla pêi cheăng hiăng hlo, tung pơla pro hlá mơ-eá vâ xo kơxô̆ liăn tŏng kum roh má môi, hên mâu kăn ƀô̆ mâu kăn kong pơlê tơring ƀă mâu kơ koan cheăng kơvâ ki mê pơkuâ tơdroăng vâi tô tuăn ‘na hnoăng cheăng  mê hôm chêh tối tro há lơ ôh inâi mâu ngế ki vâ châ tŏng kum”.

-Mơngế po rơdâ cheăng xuân ai hên tơdroăng tô tuăn xâu lơ ai tơdroăng pêi pro oh tá tro lơ tăng pro pơxúa ăm tơná tung pơla pêi pro, tiô pôa hôm kal pơkâ troăng hơlâ klâi vâ mơdât tơdroăng ki mê?

Pôa Phạm Quang Tú: Vâ kơdroh tơdroăng ki mê, tơdroăng tối thế apoăng cho troăng hơlâ pêi cheăng mê kơvâ cheăng, tơdroăng cheăng pêi tiô tơdroăng tôh pêi cheăng môi tiah Vi ƀan cheăm, bêng, khu grup, măt trâ̆n tơnêi têa, tôh kơphô̆. Tơkéa vâ tối thế pêi cheăng tơchoâm, séa ngăn mâu tơdroăng ƀă mơnhên tơdroăng pơla mâu kơ koan tơdjâk troh chiu pôu hnoăng cheăng  pêi pơrá phá.

Tiah mê rôh apoăng gá kô kơdroh ki ôh tá mơhúa cho pro pơxúa xúa ing môi ngế lơ ing tôh tơrŭm cheăng ki lâi hlo. Xua drêng pin pơcháu ăm môi ngế  lơ môi khu tơrŭm cheăng, tâng ôh tá ai tí tăng ngăn, veăng séa ngăn dêi khu ki ê mê kô ôh tá kâi tơ-ƀrê ƀă mơni kô pro pơxúa hên. Ƀă mơngế pêi cheăng ki lăm pêi cheăng, kal séa ngăn ngế ki kố ngế ki tá pơla mâu tơring ai pêi cheăng ukố umê ƀă kong pơlê ai mơngế pêi cheăng troh, ƀă túa pro ki mê kô pro ăm tơdroăng pin pá môi hdroh nếo châ séa ngăn, mơni kô bu bối ƀă ki vâ pro pơxúa xêh rôh má peá kô kơdroh.

Tơdroăng ki kal nếo cho khu xiâm ngăn cheăng pêi - mô đô̆i tro rong ƀă rêh ối pơlê pơla kal mơjiâng tíu chêh ‘măn mâu tơdroăng tung kơmăi ki po ngăn tơdrêng, riên tiô hâi khế chêh, tơkéa vâ tối drêng ai mâu tơdroăng ki klâi mơngế pêi cheăng ki lâi chêh inâi xo kơxô̆ liăn ing kơxô̆ ki tŏng kum mê, tơdrêng amê, tơdroăng chêh tối ‘na mơngế ki mê gá kô hlo amê hlối. Tiah mê, pin kô châ xut tah inâi mâu ngế ki hriăn vâ kâ pro pơxúa ăm tơná”.

Hôm! Mơnê kơ pôa !

VOV1

Gương tơplôu ƀă tơbleăng