VOV4.Sêdang - Pơtối tơdroăng roh hôp 58, kơxo lơ 14/7, Vi ƀan pơkuâ Kuô̆k hô̆i tơpui tối ‘na tơdroăng hbrâ hneăng hôp má môi, Kuô̆k hô̆i hneăng má 15. Tiô tơdroăng roh hôp má 57 dêi Vi ƀan pơkuâ Kuô̆k hô̆i, tiô tối hdrối tâi tâng hâi pêi cheăng dêi hneăng hôp má môi, Kuô̆k hô̆i hneăng má 15 cho 11 hâi tơdế. Tung mê, chôu pêi cheăng ki hên tơkŭm rah xo mơngế pêi cheăng.

A hneăng hôp má môi, Kuô̆k hô̆i kô tơkŭm tâ phĭu rah xo Kăn xiâm hnê ngăn tơnêi têa, Ngế pro xiâm hnê ngăn Chin phuh, Kăn xiâm hnê ngăn Kuô̆k hô̆i hneăng nếo. Mâu roh pơxiâm po, mơgêi; tơpui tơno ‘na cheăng kâ – rêh ối pơlê pơla, liăn ngân Tơnêi têa 6 khế apoăng hơnăm, pơkâ mơnhông mơdêk cheăng kâ – rêh ối pơlê pơla 5 hơnăm, tơdroăng tơkŭm pêi pro kơdĭng, hbrâ mơdât mơ’nhê tê kơtê hơnăm 2020 kô châ rơ’jíu, um tơvi mơ’no tơdrêng vâ kuăn pơlê séa ngăn.

Ƀă ki phá tơ-ê ‘na tơdroăng xiâm hneăng hôp, Kuô̆k hô̆i kal hôp tơkŭm a Hngêi Kuô̆k hô̆i. Ƀơrô Kuô̆k hô̆i hiăng hbrâ tơrŭm ƀă mâu kơ koan ki tơdjâk hbrâ nhên, hbrâ tŭm vâ tơniăn kum ăm tơtro má mmôi ăm hneăng hôp.

A Sa Ly tơplôu ƀă tơbleăng