VOV4.Sêdang - Kơmăng lơ 16/7, a Hngêi Kuô̆k hô̆i, Vi ƀan pơkuâ Kuô̆k hô̆i ƀă Vi ƀan xiâm Măt trâ̆n Tơnêi têa Việt Nam tơrŭm tơkŭm po Hneăng hôp ‘na hnoăng cheăng dêi Vi ƀan pơkuâ Kuô̆k hô̆i ƀă Khu kăn hnê ngăn Vi ƀan xiâm Măt trâ̆n Tơnêi têa Việt Nam. Pôa Vương Đình Huệ, kăn xiâm hnê ngăn Kuô̆k hô̆i prếi pôa Đỗ Văn Chiến, kăn hnê ngăn Vi ƀan xiâm Măt trâ̆n Tơnêi têa Việt Nam rơtế tơkŭm po rôh hôp.

A rôh hôp kố, mâu kăn hiăng tơmâng tối tơbleăng ƀă tơpui ‘na hnoăng cheăng tơrŭm cheăng pơla péa kơ koan tung pơla hdrối kố nah xuân môi tiah pơkâ mơ’no mâu tơdroăng ki kal vâ mơdêk ki rơkê plĕng tung hnoăng cheăng tơrŭm tung la ngiâ.

Tơpui mơgêi rôh hôp, pôa Vương Đình Huệ, kăn xiâm hnê ngăn Kuô̆k hô̆i tối nhên, vâ pơtối mơdêk tơƀrê hnoăng cheăng tơrŭm cheăng pơla Vi ƀan pơkuâ Kuô̆k hô̆i ƀă Khu kăn hnê ngăn Vi ƀan xiâm Măt trâ̆n Tơnêi têa Việt Nam, hneăng hôp hiăng môi tuăn kal rĕng hriăn ngăn vâ pơtối pêi klêi luât ‘nâ tâ phĭu pôk kăn xiâm, rak tơniăn tơtro ƀă tơdroăng ki pơkâ mơ’no.

Katarina Nga tơplôu ƀă tơbleăng