VOV4.Xơ Đăng - Hâi kố, Kuô̆k hô̆i pơtối tơpui tơno mơ’no tơdrêng tung um tiô troăng Internet ‘na tơdroăng tơkêa bro Pơkâ ‘na troăng hơlâ xo hnoăng  liăn mơhá liăn – mơ’no liăn cheăng vâ tŏng kum tơdroăng pro tơniăn ƀă mơnhông mơdêk cheăng kâ – rêh ối pơlê pơla ƀă tơpui tơno mơ’no tơdrêng tung um tiô troăng Internet ‘na tơdroăng tơkêa bro Pơkâ mơnúa mâu troăng pơkâ pêi, troăng hơlâ ki phá tơ-ê mơnhông mơdêk pơlê kong kân Cần Thơ. Kơxê lơ 6/1, Kuô̆k hô̆i tơpui tơno a tôh ‘na Troăng hơlâ mơ’no liăn tơdroăng tơkêa bro mơjiâng troăng kân ăm rơxế kơtâu têi Peăng Kơnhŏng – Peăng Hdroh Tơnêi têa pá mâ hâi lo hneăng hơnăm 2021 – 2025.

Tơdroăng xiâm châ mâu kăn teăng mâ rơhêng vâ ‘nâi plĕng cho ‘na tơdroăng ki châ tơƀrê dêi hneăng mơhnhôk, xúa kơxô̆ liăn ƀă tơdroăng pêi pro tơdroăng tơkêa bro. Tơdroăng tơkêa bro mơjiâng troăng kân ăm phêp rơxế kơtâu têi Peăng Kơnhŏng – Peăng Hdroh pá mâ hâi lo hneăng hơnăm 2021 – 2025 mơ’no liăn 729 km, klâ chiâng 12 tơdroăng tơkêa bro. ‘Na kơlo liăn mơ’no pêi tơdroăng tơkêa bro, tiô mơ-éa tơbleăng dêi Chin phuh, cho dâng 146.990 rơtal liăn.

Tung pơla ai hên tơdroăng pá puât, kơxô̆ liăn bu ai iâ, mâu kăn teăng mâ Kuô̆k hô̆i pơkâ thế rah xo troăng ki lâi ki kal thâ mê pêi hdrối, xêo tơmiât châ tơƀrê, rah xo troăng mơ’no liăn cheăng ƀă hía hé. Tơpui ‘na Tơdroăng tơkêa bro Pơkâ mơnúa mâu troăng pơkâ pêi, troăng hơlâ ki phá tơ-ê mơnhông mơdêk pơlê kong kân Cần Thơ, mâu kăn teăng mâ tối kô mơjiâng troăng hơlâ mơhnhôk mơ’no liăn cheăng, mơdêk tơdroăng rêh ối kuăn pơlê, mơjiâng pơlê kong kân Cần Thơ chiâng tíu xiâm mơnhông mơdêk dêi kơpong Tơbăng kroăng Cửu Long, veăng kum tơxâng tung tơdroăng mơnhông mơdêk tơdjuôm dêi tơnêi têa tung la ngiâ.

A Sa Ly tơplôu ƀă tơbleăng