VOV4.Sêdang - Hâi lơ 26/7, Lâm Đồng pơtối ai tơ’nôm 5 ngế tâ COVID-19, mơdêk kơxô̆ ngế tâ tung lâp kong pơlê tâk troh 40 ngế. Tung kơxô̆ ki kố, ai 6 ngế hiăng châ pơlât prêi. Tung 5 ngế tâ COVID-19 ki nếo, ai 2 ngế ki vê rơxế chơ kế tơmeăm vêh sap ing Pơlê kong kân Hồ Chí Minh, 2 ngế cho F1 – kơdrâi ƀă kuăn dêi môi tung 2 ngế ki vê rơxế kố ƀă 1 ngế châ ‘nâi ing klêi kơ’nâi séa ngăn a pơlê pơla.

Tơdjâk troh mâu ngế ki nếo tâ, khu ki ai tơdjâk troh kong pơlê Lâm Đồng hiăng tăng ƀă châ hlo 66 ngế F1, 189 ngế F2, tơdrêng amê hnối pơtối tơbleăng hnoăng cheăng vê hdró, séa ngăn pơreăng ƀă tăng ngế ki ai tơdjâk troh 15 tíu ki mơni tâ tú a 2 tơring Đức Trọng ƀă Đơn Dương. Pakĭng tơdroăng ki tơdjâk troh 5 ngế tâ nếo tung kong pơlê, Lâm Đồng xuân dế tăng mâu ngế ki ối achê ƀă ngế ki tâ pơreăng 95.575 a Ninh Thuận.

Thôn Phi Nôm, cheăm Hiệp Thạnh, tơring Đức Trọng (Lâm Đồng) dế pêi pro kơtăng klâ krê pơlê pơla tiô pơkâ 16 dêi Ngế pro xiâm hnê ngăn Chin phuh

Hdrối mê, ngế ki tâ pơreăng kố ối ƀă pêi cheăng a Đà Lạt, ai ối achê ƀă hên ngế. Riân troh 12 chôu hâi dế lơ 26/7, Lâm Đồng ai tâi tâng 40 ngế tâ COVID-19. Lâp kong pơlê dế klâ krê 5.643 ngế. Hnoăng cheăng hbrâ mơdât pơreăng COVID-19 dế châ mâu khu ki ai tơdjâk tung kong pơlê pêi pro, tối tơbleăng.

Katarina Nga tơplôu ƀă tơbleăng