VOV4.Sêdang - Kơxê lơ 5/7, kong pơlê Lâm Đồng hiăng ai tơ’nôm ngế ki dương tĭnh ƀă SARS-CoV2. Kố cho ngế tâ, ai tơdjâk troh ngế ki dương tĭnh ki apoăng dêi kong pơlê. Ngế ki dương tĭnh ki nếo kố cho pôa T.X.C, 56 hơnăm, ối achê ƀă ngế ki tâ pơreăng 17951 ối a thôn Phú Hòa, cheăm Mỹ Đức, tơring Dă Teh, kong pơlê Lâm Đồng, ngế ki kố vêh sap ing Hóc Môn, Pơlê kong kân Hồ Chí Minh.

Kơvâ ngăn pơkeăng ƀă khăm pơlât kong pơlê Lâm Đồng mơdêk tí tăng ƀă séa ngăn COVID-19 ăm kuăn pơlê

Pôa C cho môi tung mâu ngế ki F1 mê hdrối kố nah hiăng ăm ối krê tơdrêng, séa ngăn châ chăn ƀă pâk xo mơheăm ăm hlo dương tĭnh. Klêi kơ’nâi mơnhên ngế ki kố hiăng tâ COVID-19, kơvâ ngăn pơkeăng ƀă khăm pơlât kong pơlê Lâm Đồng hiăng pơtroh pôa T.X.C sap ing kơpong klâ ối krê tơkŭm mê lăm troh a tíu ki klâ ối krê pơlât a tơring Dă Teh.

Tiah mê, troh nôkố, kong pơlê Lâm Đồng hiăng ai 6 ngế tâ COVID-19. Nôkố, hnoăng cheăng tí tăng mâu ngế ki ai tơdjâk troh dêi mâu ngế tâ pơreăng mê xuân dế châ kong pơlê Lâm Đồng tơbleăng.

Katarina Nga tơplôu ƀă tơbleăng