VOV4.Sêdang -  Drêng pơreăng COVID 19 xông tâ tú ó, kong pơlê Lâm Đồng pơtối rak tơdroăng pêi cheăng 15 tíu mơdât pơreăng tung kong pơlê. Ing mê, châ hlo hên ngế nhôm tro tâ COVID 19 ƀă tơkŭm klâ kơtăn tiô pơkâ. Lối tơdế khế kố, tíu gak mơdât pơreăng COVID 19 a tơring Dà Huoai, Lâm Đồng, ối tung troăng kân lăm ngi kong pơlê ki ê kơxô̆ 20 tơdjêp Đà Lạt ƀă Pơlê kong kân Hồ Chí Minh đi đo pêi cheăng plâ hâi plâ măng.

Lâm Đồng hiăng teăm châ hlo tơdrêng 48 ngế F1 a mâu tíu gak mơdât pơreăng COVID 19

Xua kố cho troăng kân lăm ngi kong pơlê ê ki xiâm tơdjêp mâu kong pơlê peăng Hdroh tơnêi têa ƀă Lâm Đồng xua mê rơxế ƀă kơxô̆ mơngế prôk lăm cho kơdrâm, khu cheăng thế pơtroh lối 30 ngế, klâ 4 khu pêi cheăng tiô chôu nếo tơniăn tơdroăng mơdât pơreăng. Nôkố rêm hâi, Lâm Đồng ai lối 6.500 roh rơxế prôk lăm, ƀă dâng 14.000 roh ngế prôk lăm a mâu tíu gak hbrâ mơdât pơreăng COVID 19. Tâi tâng pơrá tơniăn châ pêi pro khăm ngăn ki tô tung châ ƀă tối tơdroăng ăm ƀok thái pơkeăng. Ing mê, teăm tơdrêng châ hlo ai 48 ngế F1 ƀă pro mơ-éa vâ klâ kơtăn tiô pơkâ.

A Sa Ly tơplôu ƀă tơbleăng